【親子好去處】點止山頂咁簡單~多個免費玩法+限時優惠

By 龍鳯孖媽 on 06 Mar 2021

畢業於科大生化系碩士和教大教育文憑，曾於小學任教數學、常識、體育和音樂科十三年。現放棄教師工作，變身成全職媽媽兼任 Miss SwanSwan，教養一對龍鳳寶寶。Facebook:https://www.facebook.com/Miss.swanswan/

今年孖寶生日，我們去了太平山頂過了不一樣的生日。本來諗住山頂有生日優惠，原來已經沒有了，反而有其他優惠（https://www.thepeak.com.hk/zh-hant/promotions）。咁岩老公係鼠年，用咗28元優惠價購買套票，包括山頂纜車來回票、摩天台入場券和特定商店的優惠券。同行者如讚好山頂的社交平台亦能以88折購買來回票套票。購買28元套票的話，就算唔入摩天台，只用山頂纜車來回票也摼番唔少。屬鼠或屬牛嘅朋友，機會黎喇！

（小編按：請留意，有關28元購票優惠已完結！）

山頂有乜玩?超乎你想像
我哋先到一間位於高層的山頂餐廰，飽覽維港景觀，嘆日本菜。店舖仲提供不同款式且特別味道的日本汽水
孖媽俾咗兩隻小魔怪試飲人生第一枝汽水，飲得津津有味
(孖媽心想:見你4歲生日先俾你試兩啖咁多啦
餐廰裡面仲有個小型日本店舖，好似去咗日本咁。入去自娛吓其實都幾好......哈哈

日本街頭小食
Don Don Don Don Don Donki....山頂Donki以售賣日本街頭小食為主，有章魚丸、可樂餅、關東煮、日式醬油年糕串等等，應有盡有。又一為不能去日本旅行止痕嘅活動

食飽飽後，我哋去咗間現實版糖果屋，冇巫婆係裡面，但有好多好多特別款式嘅糖果。此糖果屋來自新加坡，內有 bb版購物車俾小朋友自己推住選購糖果，Twin Stars即刻變身小大人。各自揀咗盒朱古力做生日禮物。

歐陸花園
沿住太平山餐廳側邊條行人路向上行便到達柯士甸遊樂場，曾是前港督的後花園。雖然遊樂場暫時封咗，但花園裡的大草地、英國維多利亞時代設計的典雅噴水池、涼亭等，也非常特別，打卡和野餐也是一流。

再行上去就是山頂花園，同樣地也是充滿歐陸情懷的涼亭，而且仲有靚靚花牆，唔使去cafe打卡啦。果度好靚，平時好多人黎影婚紗相和拍劇。(老公在十多年前已經帶我黎過，果然是把妹的高手<說笑>)

入口的藍白小屋是是守衛室，被列為香港法定古蹟呢!

充滿童年回憶的麥當勞
你有多少年無見過滑嘟嘟、小飛飛和漢堡神偷呢?

在山頂麥當勞可以重遇啊!!
山頂廣場遊樂場
除咗柯士甸山遊樂場外，仲有山頂廣場遊樂場。今次冇去玩，但上年暑假來時有玩啊~唔錯唔錯~而且側邊有櫈俾我這老人家坐坐。

行山
山頂環迴步行徑，小朋友都行到。今次冇行，但上次有行啊!
嘻嘻，除咗食的，全部都是免費!一個地方~多個玩法~

後記
1)山頂真係好多野玩，分咗兩次黎都玩唔哂。(相片結合了上年和今年的，本來想搵埋十多年前的，但真係好難搵)
2)山頂公園冬天好大風，大風到不太適宜野餐。(十多年前同老公來時是夏天，真係冇咁大風)今次大風到好似打風咁，孖媽個頭吹到成個癲婆咁，所以去到山頂公園，冇乜影相。
反而柯士甸山遊樂場無咁大風，頗適合這種天氣去野餐。
3)行上柯士甸山遊樂場條路都幾窄，帶住小朋友時要小心些。
行上山頂公園條路帶住小朋友的話更難行，因為有時要行山馬路，沿路間中亦有車經過。
4) 趁住新春優惠，來山頂走走也是不錯的選擇。以前有很多遊客，上纜車，多數也冇位坐。近2次來也有位坐啊~