【親子活動】新手爸媽如何發掘幼兒的興趣？

By 詩寧 on 04 Mar 2021

孩子一直長大，但學校一直沒有全面復課，兩三歲的將軍日日在家無聊，講到出口：「媽咪，我幾時可以返學校呀？點解咁耐都未抹乾淨啲細菌？」所以我諗不如搵些興趣給他試下。鋼琴？畫畫？打鼓？跳舞？學甚麼好呢？以我對將軍的了解，他對樂器的興趣暫時不大，但天天在家畫畫，一於就學畫畫。

兩歲幾的小朋友，真係可以畫到一幅「畫」？這樣小的年紀，不是學「美術」，而是學概念、用色、練下小肌肉、學下線條，不如自己教吧 (金牛座媽媽表示這個時勢花錢要用得其所)！自己教幾次，小朋友如果有興趣、學了基本概念再出去學未遲。但毫無藝術細胞的媽媽，如何教畫畫呢？

我問將軍想畫甚麼，他說要畫《海底奇兵》的Dory，我自問畫畫好差，研究一下，嗯……Dory就是一堆藍色加兩隻眼。

畫畫同寫字一樣，想像力很重要，所以我不允許將軍看著圖畫畫，而是我看著圖畫，再口述：「這裏畫尾巴」、「那裏畫魚鰭」、「魚要有尾巴和魚鰭先可以游水」……（眼睛是我畫的）
「Dory喺水底都有光線，所以身上的藍色深淺不一，頭淺色啲，尾深色啲，點樣可以深色？就係油多幾層……」
「除咗藍色，也有黃色，你加上黃色吧。」他焦急地把黃色髹在未乾的藍色上，然後他：「咦，媽咪，點解係綠色？」
太好了！他學了「黃加藍變綠」，還興奮地跑去同爸爸、姐姐講：「Blue mix yellow become green!!!」然後我跟他不斷玩溝色，「紅加藍變紫」、「紅加黃變橙」，就這樣他全部學會。