【帶小朋友去滑雪場可以點樣玩？教你玩盡琵琶湖山谷滑雪場】

今年1月頭帶左小豆兒去咗大阪一轉，由於想帶佢見見雪景，所以就安排左兩日一夜去咗滋賀縣嘅琵琶湖～

琵琶湖～係日本最大淡水湖！其實琵琶湖附近有好多景點，由於時間有限，我地只係參觀左其中一個 滑雪場（びわ湖バレイ） Biwako Valley Ski Area同白鬚神社，另外再去埋草津Aeon Mall(好好買)~

琵琶湖山谷滑雪場（びわ湖バレイ）位於琵琶湖西南面，可選擇自駕或乘搭公車～

《公車》從京都出發，要先坐電車到JR志賀站，大約40分鐘車程，於志賀再轉乘公車～通過巴士時間會配合火車嘅時間，出站後就會公車於車站外面等候～（車資為330yen帶滑雪用具另加100Yen)

《自駕》由於之前一晚我地住響琵琶湖嘅溫泉旅館，自駕只需10分鐘～有駐車場（1500yen)

纜車車資成人為2500yen, 3歲以下免費~豆少兩歲半免費yeah~~

另外有一種吊車加纜車一日卷，適合滑雪人士

纜車站旁邊亦有租借部，方便滑雪人士，入面幾大，大部分用具都租到～（下有收費資料）

另外亦有一角售賣滑雪用具～

出發啦！纜車上嘅豆少覺得好新奇～

纜車到山頂大約10分鐘時間，先介紹個地形先，其實好似我地咁，唔滑雪只係陪仔玩，纜車一到就係圖中橙色部分（Snow Land)~而滑雪人士就可以繼續坐吊車上蓬萊山（最高位置）～

上左山就會見到小朋友最愛嘅Snowland了~~入場券要另外買，假日有分午前券(08:30~13:30)同午後(13:30~關門)券500円，假日一日券1000円，如果平日嘅整天卷就只係500円~

豆少又係免費～佢一見到雪地就好興奮～周圍走周圍碌，即使天氣好凍但佢都保持溫暖～另一邊，跟爸爸玩雪兜，無限Loop~非常開心。

室內部份亦有很多設施，覺得太凍可以暖暖身～先睇睇餐廳，其實款式唔算多，價錢合理～

另外旁邊有一個兒童滑雪教室，有日語或英語教學，而且亦有用品租借～若果上左山先發覺唔夠暖，呢度亦有衣服租用區～

價格表可供參考～

其實呢個滑雪場賣點係可以眺望琵琶湖景色，可惜天氣唔好，之後仲開始落雪~

雖然呢個滑雪場設備比較簡陋，但雪質真係很不錯，有機會帶小朋友去關西，可以推介來這個滑雪場啊~

Text & Photos : 豆媽

【誠徵Bloggers！】想分享你的懷孕及育兒日常？請將投稿連同約40字個人簡介和近照一張，電郵到： [email protected]，我們會幫你開設個人專欄，文章經編輯部潤飾後更有機會刊登在FB專頁，快點踴躍投稿吧！