【懷孕想去個短Trip？孕媽咪深圳一日半輕鬆遊】

有左BB之後，其實都無咩機會出去旅行。一黎自己畢業之後去左幾個Grad-trip無咩錢再去旅行，二黎係因為有左BB行一陣又攰，會唔夠盡興。但當然有機會一定要去下啦，始終生完之後個1-2年都無咩機會走得甩，哈哈。

香港行黎行去都係個D地方，消費又貴，所以我決定同老公近近地去深圳行下！順便散下心！

我地夜晚收工就上左去東門既「7天連鎖酒店」住一晚，7天係內地算係乾淨同平既精品酒店，張床好大好舒服。房間好簡潔，而且都係170人仔一晚，對我黎講已經好抵！同埋佢同東門既步行街好近，一訓醒就可以去行街！

7天連鎖酒店：深圳步行街老街地鐵站二店｜東門中路2216號華佳廣場12-14樓

Check-in左之後，我地就去左食海底撈！Woohoo～ 孕婦去食，服務比平時仲好添啊！好細心咁比左個咕????同話係防電防輻射既圍裙比我。

同埋佢仲送左個「平安雞蛋」之類既野比我地，話寓意母子平安。媽媽聽到呢D真係會覺得好窩心。

訓醒第二日，就係係去行下東門，食下野、配下眼鏡、買下手機殻咁。當然唔少得要去飲「喜茶」啦！呢個真係每次去深圳必做既事！個芝士奶蓋真係飲十杯都得！

我叫左杯熱既芝士抹茶，始終有左BB飲凍野都唔係太好啦~

之後去左間Cafe到Relax下，食下Cake飲下野咁。係東門下一個站，有間叫「Lady Seven」既Cafe，係深圳好出名架，聽講係半價版既「Lady M」。環境好舒服，一件Cake都係大約38-48人仔一件，仲要個味好似好似好似Lady M（好重要，所以要講3次）！送上黎既甜品碟都係凍架，真心好專業好Surprise！

原本想叫伯爵味，但可惜賣晒，最後叫左個原味千層蛋糕。真係好有質感，軟硬適中，又唔會太甜！

有另一間分店係成橦，環境會比呢到再靚D同舒服，但因為時間問題，所以我都無去到Lu。但個到附近仲有間Hello Kitty Cafe添架！！

因為夜晚趕住返香港，所以我都無留底食埋夜晚個餐先走。但如果大家想食埋夜晚個餐，我都有個好地方介紹！如果中意食串燒既你，可以去一間叫做「木屋燒烤」既串燒店，佢地既燒蠔、燒茄子、燒韮菜等等都好好味！唔怕走黎走黎去，可以去香蜜湖站個間，大間D同個環境都好有Feel！近既話東門都有分店架！

去唔到旅行，近近地去下深圳都幾好架！不過孕婦去，記得要小心D二手煙味同要小心唔好比人撞到啊！

Text & Photos: 90後P牌媽咪

【誠徵Bloggers！】想分享你的懷孕及育兒日常？請將投稿連同約40字個人簡介和近照一張，電郵到： [email protected]，我們會幫你開設個人專欄，文章經編輯部潤飾後更有機會刊登在FB專頁，快點踴躍投稿吧！