【DIY小遊戲】提升BB觸感發展！手殘媽媽必整垃圾Sensory board！

半歲後嘅BB真係大得好快，安立寶寶喺一個月入面識得翻身、爬、坐起身、扶嘢企，由於活動能力提高咗，對世界嘅好奇亦都大大提昇！而家見到咩都好有興趣，手多多成日想搶想掂，所以係時候要做啲嘢喇！

早前睇關於幼兒發展嘅資料講到，早啲俾BB觸摸唔同質感嘅嘢，可以令佢對於新事物嘅接受能力好啲，避免好多小朋友都有嘅「觸覺敏感」，即係比如掂到沙、水、草地會好驚，有啲小朋友甚至係著件衫著得唔舒服啲都會發晒脾氣，最好嘅方法當然係俾BB出多啲街乜都掂吓，但而家衛生安全問題，喺屋企都可以俾多啲唔同觸感嘅嘢俾佢掂吓。

垃圾觸感板

你所需要嘅材料係：膠紙、鉸剪同埋一堆垃圾！

塊板係某個盒蓋嚟嘅，而唔同觸感嘅嘢，真係亂咁喺屋企東摷摷西摷摷而嚟，有唔同質地嘅絲帶、紙、布、魔術貼、膠袋、牆貼、水松貼、包裝紙，連護膚品sample、過期信用卡、bra嘅延伸扣都有⋯（哈）

延伸閱讀：
【幼兒教育】鼓勵好奇、以身作則、視犯錯為學習機會　家長不能不知10招提升小朋友自信

只要將所有材料貼晒上塊板度就搞掂，不過都要睇住BB玩好啲，右上角嗰塊因為貼得唔好，一陣間就俾安立寶寶摵咗出嚟⋯

延伸閱讀：
【兒童心理發展】想BB做個開心寶寶？媽媽分享Happy baby之育成

安立寶寶對塊板好有興趣，一畀佢佢就自己伸手去RR吓，仲識自己將塊板反嚟反去玩，但反嚟反去都係中意摸包護膚品sample有興趣，真係估佢唔到～

網上面都有好多觸感板嘅idea示範，整到好靚又有，好立體又有，仲有啲係有機關可以俾BB玩，由於安立寶寶而家只係七個月大，驚有啲細件嘅嘢痴得唔好會俾佢扯出嚟食咗，而家目的係俾佢有啲嘢摸吓，加上整呢啲嘢都需要啲時間，太複雜嘅嘢就唔整住嘞。如果之後再整，再同大家分享。

Text and Photos: 3隻黐媽B