【戒奶咀方法】埋身/手指/奶咀點揀好？一件突發事情讓孩子驚喜踏入戒奶咀之路？

初生BB從黑暗、寧靜、溫暖嘅母腹中，來到刺眼、嘈吵、陌生既世界，需要時間去建立安全感。巧兒初生時都有試過狂喊一個鐘，檢查過唔係肚餓、濕片、唔舒服，我同爸爸都束手無策，佢應該係需要安全感。埋身、手指和奶咀之中，我仔細衡量過。

Photo from Danielle

埋身實在太辛苦媽媽喇，生產後身體尚未回復，晝夜不分地餵奶、泵奶已經佔用好多時間，如果仲要埋身安撫，休息時間就更少。手指對小朋友黎講最方便，但佢周圍摸、周圍掂，唔會等你幫佢清潔後先放入口，衞生方面好難確保，而且就係因為方便，難以戒除，所以都放棄左。奶咀係身外之物，可以高溫消毒，比較乾淨衞生，而且應該會比手指容易戒除。巧兒1個月大就開始用奶咀。

Photo from MamiDaily

到6個月左右，對家中環境開始熟悉，冇咁需要來自奶咀既安全感，同時活動能力開始增強，發掘到更多事物比奶咀更好玩、更吸引，日間就冇用奶咀喇，只係下午同夜晚訓覺時先會用。話咁快，巧兒已經22個月大，我地有意識要幫佢戒除，一直等待好時機。

Photo from MamiDaily

巧兒呢排會用門牙大力咬實奶咀，再磨，仲好興奮地同爸爸媽媽分享：「奶咀有聲」。日子有功，奶咀終於被折磨至出現裂縫。三日前媽媽好凝重地一手拎住奶咀，一手拖住巧兒，好認真咁講：「巧兒咬奶咀，奶咀爛咗，再用嘅話，嘴巴會痛，所以要掉落垃圾桶喇。」媽媽表面上好冷靜，但內心好緊張，唔知巧兒會有咩反應。

Photo from MamiDaily

巧兒爽快地回應：「好！」
媽媽再幫佢做好心理準備：「咁訓覺就冇咀咀喇，不過仲有被被、bear bear陪你瞓，知唔知道？」
巧兒又係爽快地回應：「知道！」

媽媽偷偷預備手機想影低歷史性時刻：「咁巧兒依家將奶咀掉入垃圾桶啦
！」巧兒接過奶咀、踩開垃圾桶蓋、掉咗，繼續玩煮飯仔。

Photo from MamiDaily

第一晚：巧兒有講話要咀咀，但媽媽提佢已經掉咗，佢就接受。比平時用多1小時左右時間入睡，一直都好似未眼訓咁自己玩。

第二日午睡：順利自行入睡
。

第二晚：又有講話要咀咀，但媽媽再提佢已經掉咗，佢再接受。比平時用多45分鐘左右時間入睡
。

第三日午睡：skip咗，但冇提過要咀咀。

第三晚：比平時用多30分鐘左右時間入睡

真係㗎？咁順利就戒到奶咀？要再繼續觀察。在此要同奶咀講一聲多謝，多謝你呢兩年貼身陪伴巧兒成長。

＊純粹個人經驗分享，歡迎討論。

Photo from MamiDaily

延伸閱讀：
【培養閱讀】每個家長都想孩子愛上閱讀 分享3個培養舉動和必讀好書
【懷孕一刻 長憂九十九正式開始】

＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝
Text：Danielle
Photos：Danielle、MamiDaily

【誠徵Bloggers！】想分享你的懷孕及育兒日常？請將投稿連同約40字個人簡介和近照一張，電郵到： [email protected]，我們會幫你開設個人專欄，文章經編輯部潤飾後更有機會刊登在FB專頁，快點踴躍投稿吧！