「每個BB都有自己的生長線」 不論瘦B肥B都是媽媽最珍貴的寶貝！

包包係一個細碼BB，由喺肚入面到出世，4個月跌出生長線，到依家就嚟一歲都一樣係XS SIZE，大脾仔無咩肉尿片尿布仲係細碼。

同好多瘦B媽媽一樣，接近呢2年以來聽過好多閒言閒語，可能對方覺得「自己都係好心提下」，但一人一句其實都已經令新手媽媽好大好大壓力！

延伸閱讀：
【QE順產27小時全記錄（上）】
【順產紀錄】包媽孕記｜QE 順產27小時全紀錄（下）［產後房&A11私家房］

想當年自己出世得4.4磅，老公都係5磅左右，由大肚一刻起已經一直擔心包包會唔會一樣咁輕……即使孕吐嚴重，明知食完就要去嘔都係咁逼自己食嘢，真係「大嘅唔食細嘅都要食」……媽咪努力煮花膠海參長胎食物俾我，然後皺晒眉頭講句：「你咁嘔法BB有無營養架？」聽到呢句眼淚已經湧出嚟⋯

到包包出世，超過6磅終於鬆一口氣，叻過爸爸媽媽架啦﹗陪月悉心照顧下，頭個半月真係肥仔得好快好快，人奶路亦算順暢。包包一直全人奶亦好食得，但4個月返健康院打針，跌出生長線……醫生姑娘聽到佢每日餐數同每餐飲奶量，都無講啲咩，話正常體重有增長就OK。

見到阿仔手腳咁瘦又點會唔擔心……係咪因為瞓得少？因為便便多唔吸收？其實做媽媽就算唔講出口，自己已經諗過千遍萬遍。最傷人嘅係家人有時一句：「哎呀做咩咁瘦？係咪食唔飽？」明明佢已經每個鐘都食嘢，份量喺同日BB中真係算好多；「係咪你啲人奶唔夠營養呀？」聽到真係一秒激嬲母乳媽媽嘅典範﹗「做咩唔俾粥佢食呀食粥先長肉﹗」粥仔比起糊仔同BB麵食少3/4，食得少到時咪又係話我……

就算有時搭車搭電梯，總有啲唔識嘅路人「BB好得意喎，係瘦咗啲囉」……其實好明白大家可能只係出於好心，無惡意問下有無咩問題，但一個人問一次，姨媽姑姐朋友一人一次，試想像媽媽承受緊幾多壓力……其實肥瘦除咗因為食量，好多時仲有其他嘢影響，包括遺傳，醫生都話包爸包媽細個都細細粒，佢輕身啲都屬正常。

慶幸包包真係好食得，未加固已經一日六七餐200ML，加固後餐餐十分鐘食清大半碗糊仔，認識嘅瘦B有啲仲要唔願食，媽媽真係會好擔心好自責。

我都係到包包九個幾月先開始睇得開，學健康院醫生姑娘話齋，每個BB有自己嘅一條生長線，只要體重係平穩向上升就無問題，而且出世至今包包都真係托賴好健康﹗希望大家以後見到肥B好瘦B好，鼓勵啲講一句「健康就好了」特別呢幾個月疫情下，更明白無嘢比健康更重要。

瘦B媽媽，一齊加油！

＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝

Text & Photos：包媽雲妮

【誠徵Bloggers！】想分享你的懷孕及育兒日常？請將投稿連同約40字個人簡介和近照一張，電郵到： [email protected]，我們會幫你開設個人專欄，文章經編輯部潤飾後更有機會刊登在FB專頁，快點踴躍投稿吧！