【生產過程】地獄黑仔33小時(二)

個個媽媽都話:一孕傻三年。我絕對認同，因為生產時所經歷過嘅痛苦都好似唔多記得，只係記得好辛苦同好想不如一槍打死我，所以我都係憑模糊嘅記憶打呢篇野出來。 入院時大概係下午5點。喺產床上休息左一陣之後，助產士就幫我上水球，先將導管塞入去，再用水充滿個汽球，等子宮頸變薄。

開頭都仲頂得順，係子宮入面感覺到有d壓力，但都係唔好受，加上又會有少少宮縮。 但內診先至係最難頂，俾人成隻手隊入去撩，頓時覺得做女人好可憐。

喺呢33個鐘頭入面，總共換左三team人，而好不幸地呢三team人都有問題。

第一team的助產士話我知我已經開了8.5cm，我以為幾個鐘之內可以卸貨，所以我就死頂齋食止痛藥，夾硬食左冷冰冰嘅三文治同沙律加幾舊餅做晚餐。

加上隔離房係咁傳出慘叫聲，但我知道，9嗌是沒有用的。成晚勉強地叫做訓下又醒下補充體力。

誰不知第二朝早痛到扒街嘅時候第二team人話我只開了4cm，我即刻崩潰了，頂左咁耐，個子宮頸會收翻細嗎？我同家人一再追問，醫生都只係話因爲個助產士係新人同子宮頸有彈性而有誤差。

到左嗰一刻我已經唔理，即刻叫助產士俾我試晒所有止痛options，鴉片類止痛貼、笑氣完全沒有用，笑氣仲要有陣臭膠味。試埋坐健身球碌碌下、沖熱水涼都係無用，仲要一路沖一路成個人痛到震一路喊，嗰個moment絕對係人生最慘。到了差不多24小時，助產士再幫我內診，但子宮頸只係開多了0.5cm，我真係頂唔順了， 我知道我一定要打無痛，如果唔係咁搞法我到時一定無力push。

我好決斷同助產士講我要打無痛，同時我都好無奈點解第一team人可以咁都可以錯得，如果我知道我有排都未生得，我一定會早d上無痛。

點知奶奶同我媽講話唔好上無痛啦對bb唔好，仲以為外國人會開通d。好彩我阿媽話:呢樣係佢自己話事，你同我都無權出聲。我終於明白新抱永遠都係外人呢個道理，係阿媽先會體會到自己個女嗰種辛苦，所以嗰個moment我係勁嬲佢地全家。

麻醉師來到我床邊同我解釋個流程同可能嘅副作用，但我一句都聽唔入耳。快快手簽完字著好袍消毒完，我就坐喺床邊捉實我阿媽隻手等上麻醉。

陣痛都愈來愈強烈，所以我都好慶幸我決定要上無痛。我訓喺我媽膊頭咬牙死忍住陣痛一路揸實我媽對手頂住唔郁，因為我知可能有癱瘓嘅風險。
正當我以為順利搞掂晒，點知麻醉師有d口疾疾同我講，佢應該有少少插深左，所以我之後可能會有d副作用，我心諗俾我抖下好嗎？但喺嗰一刻我都已經痛到想死唔理得咁多。

上完麻醉會有個泵俾你自行加藥，但只會比你特定劑量，所以你死噤難噤都唔會overdose。之前上網睇過如果劑量太高的話有可能延長產程甚至用唔上力push，所以我都控制住自己唔好太貪心。

麻醉kick in左之後感覺簡直由地獄直上翻人間，只會感到子宮抽搐但完全無痛感，終於可以好好休息一下。

之後夜晚到第三team人交更，可能佢唔想翻夜更，又有可能有歧視成份，助產士一來到就已經態度麻麻，又話上一手人無交帶，我媽好聲好氣問佢問題又扮聽唔到，反而我鬼佬老公同佢講野就問一句搭十句咁。

我已經成日無食過野，但打完無痛醫生又話唔可以食野，所以阿媽就用水溝稀小小蘋果汁我飲，成個下午痛到出晒汗成個人虛脫，所以我一個唔覺意飲左幾杯。

因為藥物嘅副作用加上突然咁多液體喺胃，搞到我忍唔住好似噴水池咁嘔晒落床。我心諗今舖大獲了，個助產士已經唔likey我，仲要俾麻煩佢。

我已經係咁say sorry不過個助產士都係黑口黑面，又一野推起我撻翻底完全無視我背脊上面嘅導管，加上佢換床單時仲整斷埋自己手鍊，睇怕今次我都係無運行，準備俾佢喺下面剪多幾刀都似。

但自問都好有禮貌，因為本身都係藥劑師，有見識過衰客有幾衰，所以我都成日唔該前唔該後，又同d姑娘助產士話唔好意思要麻煩你地，希望佢地對我同bb都會caring d。唔通因爲我不是本地人？但我都係有工作有交稅，唔明為何我會受如此對待。

Text & Photos: 新手媽咪手記by吾係阿化