褀褀媽咪: 齊來認識「畢得鳥家庭」學習愛護這個家

外面嘅世界無論有多精采，家始終係心靈寄託之所。褀褀雖然仲細，我已經好在意要同佢建立親密嘅聯繫。我哋喺1月4號參加咗家庭議會舉辦嘅活動，攞咗一本好靚、色彩豐富嘅《畢得鳥晚餐的秘密》繪本，我真心覺得幫到手。

繪本適合二至六歲兒童喺家長或較年長嘅家人陪伴閱讀，內容圍繞住畢得鳥家庭嘅8位成員，包括爺爺嫲嫲、爸B媽Mi、姑姑、兩位小朋友，同一隻似小雞嘅畢家寵物「畢得鳥」。一家人性格各異，連名字也特別過人。

故事中畢家各人，因爲各自嘅想法和欠缺溝通，加上沒有嘗試易地而處去看事情，所以誤會叢生。擁有特異功能嘅「畢得鳥」穿插喺眾人之間，不但能看透各人嘅心事，更成為排難解紛嘅「和事鳥」……想知故事結局，就等你哋自己睇啦！電子版繪本可從家庭議會網站免費下載。

祺褀話故事好有趣，我講完仲要爸爸再講一次~

愛不惜手文具套裝

吸引褀褀嘅唔止有故事書，仲有現場免費派發嘅文具套裝，有顏色筆、填色簿、貼紙、四色印仔同原子筆，褀褀一返到屋企就即刻攞本填色簿同顏色筆出嚟，好開心咁油油油。當然唔少得攞埋貼紙同印仔出嚟，又貼又印！真係冇佢符～

褀褀呢個年齡最喜歡就係呢啲小遊戲，佢有能力做到，而且又可以訓練到手仔小肌肉同手眼協調，畀佢接觸不同顏色又可刺激腦部發育。佢喺度油呀油，好安靜好有耐性，連我都可以享受一刻獨自活動嘅時間。Me time 對於雙職媽咪嘅我，真係好緊要!

之後，我仲上埋家庭議會網站見到有免費下載嘅互動遊戲冊，裡面有齊迷宮、連線、填色、配對呢啲小朋友最鐘意嘅小遊戲，不但考驗孩子嘅觀察力，亦灌輸正確嘅生活常識。我已經第一時間下載咗互動遊戲冊畀佢放假時玩。遊戲對小朋友嘅情緒發展有很大的幫助，透過遊戲能減輕佢哋嘅心理焦慮，並訓練佢哋控制自己嘅能力。提提大家，填色簿亦可從網站免費下載㗎！

網站原來亦已經連載咗25集「畢得鳥家庭」連環漫畫，故事內容生動細膩，講述「畢得鳥家庭」的日常生活，雖然簡短但好有意義。好似一個「沒有你...那有我」嘅故仔，講到小朋友好多時會嫌屋企嘅老人家慢，又唔識新科技，但係佢地忘記咗自己細個時，長輩對佢哋嘅包容與教導，睇完真係眼濕濕。夜晚臨瞓前，我可以同褀褀講下呢啲咁有意義嘅睡前小故事，應該可以教到佢呢啲小故事嘅大意義。

好多謝家庭議會製作咗咁多又靚又實用嘅親子活動資源，連我都學到嘢呀！作為媽媽，我最希望畀到褀褀一個溫暖嘅家。我好認同張崇德先生喺1月4號活動嘅分享，要建立開心融洽嘅家庭，唔應該計較誰是誰非，關係先係最重要嘅！