【懷孕記錄】37週先有妊娠糖尿？！

By 晞怡媽媽 on 02 Dec 2019

大部分有需要嘅準媽媽都會係24 - 28週進行葡萄糖耐量測試，而我個陣測試結果係冇問題嘅，所以冇咩戒口，一直都喺政府同私家醫生度做產前檢查。直至到37週，我嗰日要去政府同私家做產檢，早上係政府做，中午係私家做，因為政府冇超聲波檢查，我想睇到BB所以重複係私家做多一次。早上係政府醫院檢查一切正常，但中午食完午餐就去私家檢查，驗小便時發現有蛋白尿同糖份都唔合格，照完超聲波、摸完肚仔之後，私家醫生就寫張醫生紙比我拎去政府醫院，內容大致係話我有蛋白尿同糖份超標。第二日我就乖乖咁拎去母嬰健康院比護士睇，跟住等見醫生。

見醫生都話「奇怪，早上冇事，點解中午會唔合格！？」，醫生唯有安排我2日後飲多次糖水，感覺有點嘔心，因為好肚餓，忍到2個鐘後再抽血，終於可以食野喇！

但仲係未知結果，做測試嗰日係星期四，護士叫我留意電話，有結果會打比我，所以一直都好緊張。過咗幾日之後，護士打電話黎約我第二朝要見醫生，心知不妙。

第二日，醫生話我有妊娠糖尿，需要聽日08:00入醫院做檢查，我就返到公司即刻請假，我心諗應該第二日可以出院啦，冇問題嘅。

入院照常帶走佬袋、身分證、牌板，係急症做登記，上病房等醫生檢查⋯

等咗個幾鐘終於到我照超聲波，醫生好嚴肅咁講：「太太，你已經足月生，不如催生啦！BB都有3.4kg都夠磅數，而且報告話你有妊娠糖尿病，對BB唔好，聽日催生啦！」

我當下係好驚又唔想催生，因為差7日就新年，而我又想生「豬仔」，所以拒絕催生。返到病房護士幫我篤手指驗血糖，一切正常。咁就開始咗篤手指既日子喇，早餐空肚一次，食完冇耐又一次，總之全日都要mon住血糖。

住院第二日，BB 37週6，醫生巡房又開始遊說我催生，但係我都唔太想，之後一位應該高級啲嘅醫生行埋嚟講：「太太，雖然驗血糖一直都正常，但係如果突然間血糖上升得好快， BB同你都會有生命危險， BB好可能會胎死腹中！」佢一講完我就打電話俾老公，將醫生講既說話一字不漏講比佢聽，最後大家都得到共識就係要平安，所以決定催生！

早上05:00，起身去洗頭沖涼，06:00準時塞催生藥，開始用機mon住宮縮，之前我都試過宮縮，心裡係好驚、好可怕！08:30醫生檢查已經可以入產房，係產房真係好痛苦⋯⋯宮縮愈來愈密、愈來愈多、助產士幫我穿羊水，過咗一陣就開始有急便便嘅感覺，尾龍骨好似有野係咁推出黎咁，之後助產士過嚟幫我睇已經開到10度見到BB個頭仔，準備等肚仔一痛就用力push！幾下之後，晞怡就被護士抱到我身上，眼淚不自覺係咁流出嚟⋯晞怡爸因為冇陪產（其實係我唔準佢陪）所以要等到出產房先見到晞怡BB。