【媽媽辛酸】包媽孕記｜做媽媽原來連生病的權利都沒有⋯⋯

生BB之前已經有心理準備，生完之後整個世界都不再一樣，所有心思都同BB緊扣住。放假唔會再瞓到自然醒，再無得自由自在放工出去同朋友食飯、唱K、睇戲、去旅行？諗下好啦⋯⋯

包媽好少喺網上放負，呢幾日真係比較低氣壓，因為氣管炎病咗，一呼吸就會咳，呢兩晚係完全無瞓過覺，然後今朝睇第5次醫生，拎完藥再繼續返工、泵奶⋯⋯不停咳完又咳，把聲MAN過?昆，個人暈到一個點，比著以前當然睇完醫生，乖乖地食藥瞓返兩日就好。但做咗媽媽，原來連病嘅權利都無⋯⋯

喺屋企要全天候要戴口罩，要一路咳、一路噴消毒噴霧，繼續陪阿仔玩幫佢換片沖涼，到佢瞓覺要做家務、清潔玩具直到深夜先有得休息。就算有人幫手湊，夠鐘都谷奶要起身泵，病咗又會奶量大跌，見到泵出嚟嘅量就好大壓力！

今朝已經睇第5次醫生，連醫生都搖晒頭話「真係病得好重喎你今次⋯⋯」其實醫生有試探問要唔要停一兩日人奶轉強啲嘅藥，但，母乳媽媽總係有種莫明堅持，病緊可以經由人奶俾更多抗體BB，令佢更強壯，所以我戴住口罩都堅持繼續埋身，亦因為繼續餵奶，藥力不能太強，只能靠意志力撐落去⋯⋯

本來以為生BB已經係打大佬，原來病住湊BB唔知幾時好仲更加煎熬。但再辛苦都會撐落去，或許呢啲就係天生嘅母愛力量。

向天下所有媽媽致敬，大家都辛苦了～一齊加油！

#屋企有BB病真係要戴口罩？
#成家不停互相傳染辛苦嘅還是媽媽？
#邊個病都係媽媽最攰
#人奶媽媽的堅持

＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝

Text & Photos：包媽雲妮

【誠徵Bloggers！】想分享你的懷孕及育兒日常？請將投稿連同約40字個人簡介和近照一張，電郵到： [email protected]，我們會幫你開設個人專欄，文章經編輯部潤飾後更有機會刊登在FB專頁，快點踴躍投稿吧！