【冬天必喝滋潤糖水：雪耳杞子紅棗圓肉】

天氣開始轉涼，係時候要將啲寒衣慢慢拎返出來啦！天氣凍，小JM媽既為食基因又再蠢蠢欲動，趁住假期又整左個簡單易整既滋潤養生糖水，大人、小朋友都一樣岩飲之餘，預產前既孕媽媽又可以多一款糖水做選擇添！

滋潤養生清甜糖水 - 雪耳杞子紅棗圓肉
聽就聽得多，但你有對呢幾款材料有幾認識？
不如整之前我地一齊了解下～＾＾～

雪耳：
中醫角度認為雪耳性味甘淡平，對肺、胃、腎均有裨益，有滋陰潤肺功效，適合肺陰虛、肺氣腫及虛勞咳嗽，咳中帶血，經常感到口渴、胸悶氣短人士食用。雪耳含植物性化學成分，而當中既蛋白質就含有17種氨基酸，其中7種仲係人體必須既氨基酸，有助促進新陳代謝添架！

*小提示*
雪耳有滑腸既功效，所以孕媽媽初期都係唔好食啦。乖乖地等到預產期前先食啦。

紅棗：
紅棗含有豐富維生素、果糖及各種氨基酸。中醫認為紅棗性暖、養血保血，可改善血液循環外，亦可養顏美容。

杞子：
杞子味甘，性平。有淺腎、潤肺、補肝、明目既功效。

圓肉：
圓肉味甘、性溫，益心脾，補氣血。對失眠健忘，脾虛腹瀉，產後浮腫，精神不振，等病症有效。
#材料：
雪耳  半朵
杞子  適量
紅棗  適量
圓肉  適量
冰糖  少量

*因為只得我同小JM食，所以我地唔整太多，用半朵雪耳剛剛好。

#做法：
1.）預早將雪耳取出並浸水，以作清洗。浸透後即可將雪耳芯除去。

2.) 將紅棗核取出，並剪成小片。一粒分為三片即可。

3.）將杞子、紅棗、圓肉浸水以作清洗。預備少量冰糖備用。

4.）最後將材料放入滾水內一併煮約40分鐘即成。

呢款養生糖水不論冬天抑或夏天一樣都咁岩食，夏天咁熱就可以將糖水雪凍再慢慢嘆，一樣好味！
原本坐唔定既小JM知道有糖水食即時乖乖坐定定，仲好鍾意食雪耳添！＾＾
見到你食得咁開心，媽媽都一樣開心！

Text & Photos: 傑。斯與晴

【誠徵Bloggers！】想分享你的懷孕及育兒日常？請將投稿連同約40字個人簡介和近照一張，電郵到： [email protected]，我們會幫你開設個人專欄，文章經編輯部潤飾後更有機會刊登在FB專頁，快點踴躍投稿吧！