【開心迎接二寶的同時 千萬別忘記照顧大寶的感受】

【開心迎接二寶的同時 千萬別忘記照顧大寶的感受】

爸媽分享 家庭關係 新手媽媽 湊仔經
By禧。熙。之生活點滴 on 27 Sep 2019

禧家姐係婆婆屋企既第一個孫,由出世開始已經係萬千寵愛在一身,所有舅父阿姨、親戚朋友都好愛錫佢。

156959721389BB08DD99-FCED-4319-920E-3C543003968C

大概喺禧家姐20個月大既時候我就有左熙弟弟。由見肚開始,成個懷孕過程,我同禧爸都盡量俾家姐參與迎接弟弟出世既準備工夫,例如買初生用品、衫褲、bb床等等,令佢有個意識知道會有弟弟既出現,屋企會多個新成員同埋佢將會成為家姐。佢好似都慢慢接受同明白,每次問佢弟弟喺邊,佢都會指住我個肚話弟弟喺度。

但家姐由出世到而家主力都係我照顧,無論訓覺、食飯、沖涼、返學放學我都同佢一齊,可以講係形影不離!所以當弟弟由醫院返到屋企之後禧家姐既行為開始倒退,情緒亦唔太穩定,因為原先就只有佢佔有爸爸媽媽既全部愛,大家焦點都放喺佢身上,而家突然間多左個弟弟,難免佢會唔習慣。無論我係同弟弟傾計、餵奶、冲涼定係氹訓覺,家姐都好抗拒、會大叫大喊要媽媽、一定要我抱,甚至曾經動手打過弟弟。行為倒退方面,家姐會要求食奶嘴、會霸住弟弟張床訓、要玩佢玩緊既玩具、要著弟弟既衫等等。另外家姐既心情都好易被弟弟牽動,弟弟喊佢會話弟弟嘈、會叫佢收聲。呢個情況維持左一段長時間,大概係熙弟弟滿五個月既時候,情況就開始有改善, 家姐好似接受左有弟弟呢回事,到而家佢仲會氹弟弟笑。其實我同禧爸都用左唔少心機同時間去安撫家姐,希望佢唔好抗拒弟弟。

以下喺我哋既少少分享:

- 我哋不會在家姐面前講: 我錫弟弟唔錫你呢類說話。因為小朋友好單純,佢哋可能真係以為父母有左二寶就唔再愛佢哋,會對二寶更加有仇恨感

- 就算要照顧弟弟既同時,都會預留獨處既時間俾家姐,例如:夜晚會有睡前故事時間又或者單獨外出遊玩時間

廣告
廣告

- 俾多啲機會家姐去參與照顧弟弟既工作,我哋會請家姐幫忙攞尿片、攞奶、攞衫褲鞋襪俾弟弟,亦會請佢幫忙餵弟弟飲水食粥仔

- 唔好只係責怪家姐,要公平對待。好似有時弟弟訓左覺,家姐故意大聲嘈醒弟弟,我會話佢、制止佢。同樣地如果弟弟嘈住家姐訓覺,我亦會叫弟弟唔好嘈,會影響家姐,當然弟弟係未識聽,但最好由佢地細個開始就要做到公平公正

- 盡量不要將小朋友作比較,雖然兩個都係我十月懷胎生岀黎,但每一個小朋友都係獨立個體,根本不能作比較。 少講一啲比較性說話,例如:你睇下弟弟幾乖,你幾曳!其實有時佢哋係故意曳,要吸引父母注意!

- 無時無刻都要提醒自己,家姐雖然係大寶,但其實佢都只不過係一個2、3歲既小朋友,仍然好需要父母既關懷同照顧。唔好因爲有左弟弟而覺得家姐已經長大,可以獨立。

雖然佢哋而家有時會你整喊我,我整喊你,日日都好嘈,但只要佢哋快樂、健健康康都係一件開心事。其實無論係大寶定二寶,都一定係父母心目中既「寶」!

==============================

Text & Photos:禧。熙。之生活點滴

【誠徵Bloggers!】想分享你的懷孕及育兒日常?請將投稿連同約40字個人簡介和近照一張,電郵到: [email protected],我們會幫你開設個人專欄,文章經編輯部潤飾後更有機會刊登在FB專頁,快點踴躍投稿吧!

Share to Facebook