![【俾小朋友盡情放電!遊日必去大阪Legoland~連爸媽都玩得好開心!】](https://image.mamidaily.com/wp-content/uploads/2017/12/mami_1000x525_DEC201719.jpg?auto=format&w=718)
【俾小朋友盡情放電!遊日必去大阪Legoland~連爸媽都玩得好開心!】
上次講到我地買左1-Day Pass去海遊館,仲有門劵優惠添。
今次我地就介紹埋係海遊館隔離既 - Legoland Discovery Centre!
我地帶小JM去左海遊館睇最巨大既鯨鯊,睇完仲去左體驗館度親親小魟魚同鯊魚添。
玩完一輪就緊係要去醫肚啦,所以我地就去左係海遊館隔離既Shopping Mall,食飽之後就緊係去Legoland Discovery Centre放下電啦!
亦因為有Day Pass既關係,我地去Legoland係「免費」架!
而且當日入館仲唔駛排隊,一入即時有得玩添!
不如你都一齊睇下有幾好玩,到時去到大阪又多個放電好去處啦嘛!
大阪Legoland Discovery Centre 小簡介:
係一間以Lego積木為主題既室內遊玩樂園。
Legoland內設有多個不同遊戲館,有機動遊戲、Playzone、燈光展館、4D電影等遊樂設施,可以俾小朋友們盡情探索及體驗。
Legoland Discovery Centre資料:
地址: 港區海岸通1-1-10
營業時間: 10:00~19:00或20:00 (營業結束前2個小時停止入場)
入場收費: 2,300YEN
*必須有小朋友同行方可入場*
如果沒有買Day Pass的話,可以於網上預訂入場劵喔。
好啦,一齊出發去Legoland Discovery Centre放電啦!
一入到去小JM已經急不及待想去玩Lego啦!
係門口售票處位置側邊有一幅Lego人型既Lego牆,可以俾小朋友係爸爸媽媽排緊隊買飛個陣玩住等架!
當日售票處既哥哥見到小JM就大叫「卡哇兒」,之後衝左去係小JM隔離諗住撩小JM玩,點知小JM就俾哥哥嚇到呆左,唔識俾反應~XD
可能因為今日落大雨又臨近打風,今日既人流唔算好多,唔需要排隊就已經可以即時換到入場劵啦。
臨入場前我地仲買左本Collector 小冊子,係用來收集場內相關既印仔,哥哥仲送左張Lego貼紙俾小JM添。
一入場就已經可以收集到第一個印仔架啦,哥哥好細心咁同爸爸一齊教小JM點蓋印。
印完之後就可以一家人一齊影返相大合照,有興報購買相片既話就可以臨走前買走喔。
影完相之後我地將會去到一個遊戲世界,入面好似打機咁架,好岩大人同小朋友一齊玩,仲可以組合出自己鍾意既Lego人造角色添。
不過好可惜,呢個展館內係唔俾影相架,所以我地都好乖乖咁玩完正式入場館放電。
進入場館最先會見到一個放置BB車既位置,爸媽們可以將BB車泊好,再同小B一齊去玩,咁就自然輕鬆好多啦!
好囉!一齊睇下有咩玩啦!
一入門口右手邊已經有兩個不同遊戲館可以俾大家熱熱身!
你會先先見到一個以恐龍為主題既Logo館。
#恐龍Lego館
館既中央有一個好大既Lego恐龍場景台,可以俾大人同小朋友一齊砌Lego!
館入面每個各落都有大大小小既恐龍Lego擺設,仲有恐龍蛋添,全部都係由Lego砌成架!真係好犀利呀!
恐龍館隔離會有一個機動射擊既遊戲館。
就好似迪迪尼咁,坐係火車卡再用槍射擊目標,之後就緊係鬥高分啦!
不過呢個館係唔俾影相架,有幾位工作人員係度睇住既,所以大家就唯有幻想下個館係咩樣係啦。
(圖中左下角張相就係館既排隊通道影架啦!XD)
熱完身就緊係要進入主場館睇下入面有咩玩啦。
一望過去,你就會見到一雙用Lego砌既飛龍模型,又可以打下卡,影下相啦。
另外這裡還有「 4D館」, 想睇4DMovie?無問題,只要跟返放映時間到來4D館就可以免費入場架啦!
館門外仲會有姐姐派 4D眼鏡俾大家添!
係4DMovie 播放既時候仲會有特別效果出現架。
你可能會濕下身,場景又會出下煙咁,你都同小B來感受一下啦!
如果4D館未夠鐘放映唔緊要,可以去左 MINILand 玩陣,睇下啲Lego模型先都得!
#MINILAND
MiniLand入面既場景係呈現左大阪既一啲特色景點,每一個景點都好吸引,做得好仔細架!
你以為就咁望下模型就算?點止咁簡單!
MiniLand仲可以呈現出大阪日與夜兩種場景架,夜晚仲可以睇到煙火添加!
你留心啲睇下!!!!橋個度既係~哥。斯。拉~呀!!!
無錯,你無睇錯,只要你按一按模型前方既按鈕,哥斯拉就會被你召喚出來架啦!
除左哥斯拉,你仲可以來返個「二人摔角時間」,平時打架媽媽就會唔高興,咁就唯有同爸爸「打」摔角係啦!
再唔係打個全壘打都仲得!全場即時為你歡呼!
而另一邊仲會有一個大既Playhouse,入面仲有滑梯同出奇地咁多既大積木架!不過可惜小JM仲未夠高玩呢兩樣野,所以只可以轉戰到下一個遊戲室係啦。圖中你見到有幾座Lego大廈林立既枱面其實係有特別機關架,小朋友只要慢慢將積木砌好,再開動枱上既震動裝置,就會知道自己砌既「屋」夠唔夠堅固架啦!唔夠堅固分分鐘會被震散,所以都好考小朋友既定力!
另外館內有個位係俾小朋友砌車仔既, 可以同其他小朋友一齊各自砌部戰車出來,再一齊鬥快架!
小JM就未識玩,所以只係同左Lego賽車人影相就算了。
除左有男仔鐘意既遊戲室之外,館內仲有一間Lego屋,岩晒女仔玩架。
有花園啦、廚房啦、客廳啦咁,真係五臟俱全架!係Lego屋門前仲有得寄明信片添架。
而屋既隔離就係一個「樂園」,一個Lego遊樂場呀!
你睇,仲有牛牛添呀!係咪好得意呢?唔單止咁,係館中心仲有一個Lego大笨鐘添呀!真係識郁架,唔係假野來架。
連餐廳都係用Lego砌成架!真係好夢幻呀!
就連餐廳附近既活動室都係滿滿既Lego!仲有Lego機械人添呀!
LegoLand唔單止帶俾小朋友歡樂,連爸爸媽媽去到都一樣玩得好開心,可以話係輕鬆又愉快既放電之旅呀!
Text & Photos: 傑。斯與晴
【誠徵Bloggers!】想分享你的懷孕及育兒日常?請將投稿連同約40字個人簡介和近照一張,電郵到: [email protected],我們會幫你開設個人專欄,文章經編輯部潤飾後更有機會刊登在FB專頁,快點踴躍投稿吧!