感染HPV生腫瘤 1歲女兒歷6次割喉手術 母自責內疚

一名22個月大嘅女嬰，出生後確診感染「人類乳頭瘤病毒」（HPV）。由於病情反覆，經常復發，女嬰至今已經做咗6次割喉手術，往後更可能要再經歷多至少30次手術。

內地女嬰甜甜出世3個月時，媽媽發現佢嘅哭聲沙啞，喉嚨好似被堵塞住一樣，於是帶佢去醫院檢查，發現佢喉嚨位置有腫瘤，證實感染HPV。媽媽指產檢時一切正常，加上自己喺農村生活，完全冇諗到要做HPV檢查，因此唔知自己帶有HPV病毒。當知道女兒係因為自己而受感染後，媽媽非常內疚。

Photo from MamiDaily

由於甜甜喉嚨嘅腫瘤堵塞住氣管，導致呼吸困難，目前只可以透過手術切除。但因為小朋友嘅喉部好窄小，手術空間有限，好難一次徹底切除。而呢個病嘅病特徵係百分百復發，切除後仲會再生，所以甜甜需要每兩至三個月做一次切割手術，直至7，8歲，估計至少仲要經歷多30次手術。

Photo from MamiDaily

媽媽心痛得落淚：「女兒全身插住管子，手腳都被綁住，醫生怕佢自己拔管。」甜甜至今已經做咗6次手術，每次入到手術室都非常害怕，甚至想逃走。日前更因病情突然復發，需要喺冇麻醉嘅情況下進行切割手術。媽媽表示難以想像甜甜所承受嘅痛楚，一定會喺佢身邊陪住佢，希望佢可以堅強活下去。

Text：Mami Editorial