三歲定八十!仔女呢4種性格要即刻改

三歲定八十!仔女呢4種性格要即刻改

mami熱話
ByCircle on 22 Aug 2019 Digital Editor

大個咗之後就知道有啲性格對人生唔單止冇幫助,反而會改咗自己。成日都話三歲定八十,性格絕對係由細慢慢形成~ 家長唔想小朋友喺長大嘅過程中畀人欺負或排擠嘅話,就唔好再縱容佢哋。如果佢哋中咗以下4種性格嘅其中一個,最好快啲諗辦法幫佢哋改變下啦!

1. 害羞/慢熱
仔女喺屋企成個小霸王咁,但係見到陌生人就好怕醜,聲都唔敢出嘅話就要注意了。性格害羞嘅小朋友一般離開comfort zone就變得好安靜,見到其他小朋友就算想一齊玩都唔敢,對未去嘅地方、未見過嘅事物都會感到好緊張,原因係佢哋容易缺乏安全感,或者有啲自卑。呢種性格對未來嘅影響頗大,對交友、自信心、甚至工作都有壞處。

2. 怕事細膽
有啲小朋友對一啲未做過嘅事情好抗拒,或者要用好長時間先會接受一件事。怕事細膽對小朋友嚟講,絕對有需要幫佢哋發展勇氣呢種性格!唔係嘅話,喺佢哋嘅成長過程中,會錯過好多機會,原因係佢哋唔敢主動去爭取。

廣告
廣告

3. 固執
小朋友堅持己見唔肯同其他人商量嘅話,唔好話對日後成長有影響,剩係父母都好難照顧佢哋!固執嘅人一般情緒不穩定,好容易發嬲,咁樣會令到其他人遠離佢!加上佢哋自尊心較高,只相信自己而唔信其他人,好易同其他人發生磨擦!最大影響一定係人際關係~

4. 自私
如果小朋友好多玩具、食物都唔肯同其他人分享,家長就要諗諗計啦!自我中心嘅人絕對只顧自己利益,咩都要人哋遷就佢,再衰啲嘅就可能成日講啲無理嘅要求要人成全佢!家長真係要重視,最好馬上引導佢改變!父母都唔想自己嘅小朋友變成神憎鬼厭嘅人㗎~

Text:Mami Editorial

Share to Facebook