唔使勞氣！4招對付「硬頸」孩子

小朋友年紀細細已經好有主見，非常固執，又話唔聽？家長面對呢個情況，往往都出手無策。但其實小朋友反叛，可能係想得到家長嘅注意。家長又可以點應對呢？

Photo from MamiDaily

1. 冷靜

小朋友唔聽話，不停挑戰家長底線。家長第一時間應保持冷靜，唔好畀小朋友嘅情緒牽動。若家長只顧著破口大罵，小朋友不但唔會屈服，甚至會變本加厲。

2. 了解原因

小朋友堅持己見，堅持只做自己想做的事情，家長唔應該以指令式語氣去阻止。例如小朋友唔肯食飯，家長避免講：「你同我即刻食哂啲飯！」、「唔食就以後冇得食！」。如此強硬嘅態度只會令小朋友更加唔願意妥協。家長應了解小朋友唔肯食飯嘅原因，例如係咪想玩玩具、睇電視等，然後再向小朋友協議：「食完飯就有可以睇電視！」同時家長亦必須信守承諾。

Photo from MamiDaily

3. 樂於聆聽

當小朋友堅持做或不做某些事情時，家長唔好即時斥罵小朋友，咁樣會令小朋友覺得冇被人重視、冇人理解佢哋。家長應該先畀機會佢哋解釋，並向小朋友表示理解佢哋嘅意願，然後先話畀佢哋知咁做未必合適或正確。

4. 循循善誘

家長教小朋友或糾正佢哋嘅壞習慣時，要有耐心。部份家長經常會將：「話極你都唔聽…」、「次次都係咁…」放喺嘴邊。呢啲語句不但唔會令小朋友聽得入耳，仲會令佢哋有機會模仿，變得無禮。家長應平心靜氣地向小朋友解釋，如小朋友經常將手指放入口，家長可提議：「不如我哋一齊去洗手？」再喺洗手嘅過程中，話畀小朋友知雙手有好多細菌，如果放入口會好易病。令佢哋知道點解唔可以咁做，加深佢哋嘅記憶。

Photo from MamiDaily

Text：Mami Editorial