突然抗拒洗白白一定有原因！家長必睇4個拆解方法

小朋友嘅心情真係非常難捉摸，一時又鍾意呢樣，轉個頭又對佢好抗拒。就好似沖涼咁樣，一開頭佢哋好鍾意沖涼，有時仲會沖到唔願走。點知過兩日，竟然抱埋入去都唔肯沖涼，真係好難搞啊！各位爸爸媽媽，即刻睇吓小朋友小朋友唔肯沖涼4大原因加4個解決方法啦！

Photo from MamiDaily

原因：

1. 怕水
小朋友好細個已經識驚，當佢哋預計到會有危險嘅時候，就會下意識反抗。當佢哋突然唔肯沖涼嘅時候，最大機會就係佢哋驚水。佢哋可能驚啲水流過塊面，又或者驚會浸親，因此叫佢哋沖涼親好似世界大戰咁，軟硬兼施都搞唔掂。

2. 溫度唔啱
水溫必須要較得啱啱好，太凍又驚小朋友會凍親，太熱仲可能會令到佢燙傷。家長或者可以因應小朋友嘅需要，調較適合佢哋嘅溫度，咁就唔使驚嚇怕佢啦！

Photo from MamiDaily

3. 有陰影
有機會係喺洗白白嘅時候，曾經試過整親，又或者搞到佢唔舒服，呢啲陰影會令到佢唔想再面對沖涼。家長喺幫佢哋洗白白嘅時候，真係要小心啲啊！

4. 怕花灑
用花灑雖然沖得乾淨過用盆，不過好多小朋友都好驚。原因係有時有啲水花會噴到塊面，又或者入咗耳朵，所以佢哋唔敢再沖涼了⋯⋯

Photo from MamiDaily

解決方法：

1. 分散注意力
爸爸媽媽可以預備一啲玩具畀小朋友沖涼嘅時候玩，分散佢哋嘅注意力，令佢哋唔記得點解驚沖涼！另外，市面上有一啲專係畀小朋友沖涼用嘅浴球，當佢溶咗喺水嘅時候，入面嘅玩具就會出現～ 相信可以令到小朋友愛上洗白白！

2. 用物件輔助
「沖涼神物」你聽過未呢？有一啲兒童專用嘅頭罩，洗頭嘅時候，水同洗頭水入眼嘅機會都細啲啦！而且唔會流到去塊面度～

Photo from MamiDaily

3. 陪佢一齊沖
爸爸媽媽陪住小朋友洗白白相信係最有效嘅好方法。有大人陪住佢哋一邊玩水，一邊沖涼，可以增加佢哋嘅安全感，從而減低佢哋恐懼嘅感覺，令佢哋重新愛上洗澡！

4. 泡泡浴
好多小朋友見到泡泡都心心眼～ 家長可以準備一啲性質溫和、小朋友專用嘅泡泡沐浴露，一方面香噴噴嘅泡沫可以慢慢消除佢哋對水嘅恐懼，另一方面又唔使驚泡泡入眼會痛，重拾佢哋對洗白白嘅信心～

Photo from MamiDaily

Text：Mami Editorial