冇人完美？好爸爸必須具備嘅8大條件

媽媽生BB、照顧小朋友固然重要，爸爸喺一個有小朋友嘅家庭入面嘅角色都相當重要！對小朋友嚟講，畀錢佢哋買玩具只係負責任，未可稱得上好爸爸。究竟一個好爸爸要具備啲咩條件呢？以下8個標準，你哋中到幾多個呢？

Photo from MamiDaily

1. 愛護媽媽
一個家庭由父母同小朋友組成，爸爸同媽媽必須要相親相愛，家庭先會幸福。如果父母經常嘈交，好多時會令小朋友覺得係因為自己唔乖，先令到爸爸媽媽唔開心。所以好爸爸第一個必要條件，就係要愛錫媽媽，咁樣小朋友幸福感都會隨之上升。

2. 陪伴孩子
好多時放工返到屋企，爸爸都係坐喺度望住仔女就當陪住佢哋。其實真正嘅陪伴係坐喺佢隔離同佢一齊玩、一齊食，甚至陪佢入睡。小朋友會感受到呢啲先至係有質素嘅陪伴～ 如果返到屋企只係顧住撳電話，就要改善吓啦！

Photo from MamiDaily

3. 唔會亂發脾氣
現代人生活壓力大，耐性喺返工嘅時候已經耗盡。返到屋企只係想放鬆下，所以好小事都會好敏感，好似小朋友尖叫、扭抱呢啲都會令人變得好忟憎。好爸爸喺呢啲位，就會忍住唔亂發脾氣，至少喺小朋友面前唔好嚇親佢，當然喺老婆面前都應該收斂吓～

4. 講得出要做得到
應承咗小朋友要嘅嘢，排除萬難都一定要做得好！要做個有口齒，唔會失信於人嘅好爸爸！

Photo from MamiDaily

5. 尊重小朋友
小朋友人仔細細有好多要求，就算爸爸想拒絕佢哋，最好聽吓佢哋點講先，可能佢哋嘅原因會令你改觀呢！爸爸要尊重小朋友嘅意見，萬大事有商量～

6. 性格樂觀
好爸爸凡事應該向好嗰方面思考，避免將負能量釋放，仲可以帶積極樂觀嘅性格畀小朋友。當有一日佢哋成長後，發現人生充滿荊棘，依然可以笑住面對，對佢哋嚟講絕對係一件好事！

Photo from MamiDaily

7. 落手落腳
唔知點解，好多時總係覺得爸爸忙過媽媽好多。就算佢哋放假都好似好多嘢做咁。當一位爸爸能夠一手一腳照顧小朋友，就算唔係做足100分，肯將自己嘅時間放喺小朋友身上，都肯定係一個好爸爸！

8. 同仔女做朋友
爸爸總係少出聲，感覺比較嚴厲，但實際上其實都好愛仔女。所以爸爸應該由小朋友細個開始同佢哋做朋友，等雙方嘅關係變得更親密，可以做到促膝談心。

Photo from MamiDaily

以上8個好爸爸標準，各位做到幾多個呢？

- 1個都做唔到嘅話，需要面壁思過。

- 做到1至3個嘅話，仍需多多改善。

- 做到4至6個嘅話，做到一個合格嘅爸爸，繼續努力！

- 做足7至8個嘅話，絕對係一個好爸爸！恭喜晒！

Text：Mami Editorial