成日「嘔藥」點算好？餵BB食藥5大技巧

BB病咗，做父母除咗擔心之餘，仲好頭痛！十個有九個BB都一定扭計唔肯食藥，咁點算好？今次就同大家分享幾個餵BB食藥嘅小技巧，學識之後就輕鬆得多啦！

Photo from MamiDaily

1. 唔好捏鼻

小朋友抗拒食藥時，好多家長會捏著小朋友鼻子，令佢哋張嘴，強行餵藥。呢個做法十分危險。因為當小朋友唔能夠用鼻呼吸，單靠嘴巴呼吸，好容易會嗆到，甚至因氣道被堵而導致窒息死亡。

2. 睇準時機

好多小朋友都會「嘔藥」，特別係食完飯後再食藥，佢哋會將食物同藥都嘔返晒出嚟。家長最好喺小朋友進食後最少一個鐘先餵藥，或者空肚食藥。只要根據指定嘅時間服藥，大部份藥物都可空肚服用，建議先向醫生查詢。

Photo from MamiDaily

3. 半臥姿勢食藥

要注意小朋友嘅食藥姿勢，如平躺食藥，好易會嗆到。家長應該畀小朋友半躺喺自己懷中，用針筒、滴管或小湯匙，將藥慢慢流入佢哋口內。過程中，家長可以輕輕托起小朋友下頜，或兩頰，幫佢哋吞嚥，切忌過急。

Photo from MamiDaily

4. 唔好將食物、藥物混合

小朋友唔肯食藥，家長或會選擇將藥物與其他食物混埋一齊，畀小朋友食，如：牛奶、果汁及麵包等。但咁樣做其實可能會降低咗藥物嘅效能，令小朋友無法完全吸收。因此最理想都係單獨服用藥物。

5. 用食物作獎勵

家長期可以準備一啲濃味食物，以引誘小朋友乖乖食藥。只要味道香濃，相信便能吸引到小朋友，如：小蛋糕、餅乾或啫喱等。呢啲小食同時可以減少藥物喺小朋友嘴裡留下嘅苦味。

Text：Mami Editorial