母乳媽媽要小心！需要暫停餵哺嘅4種情況

好多媽媽都選擇餵母乳，原因係相比奶粉，母乳對BB同媽媽自都有好處。不過媽媽們要量力而為，就算餵唔到都唔需要過份自責。記住以下呢幾個情況都盡量唔好餵母乳，避免弄巧成拙。

Photo from MamiDaily

1. 食藥期間
好多人都話媽媽患小病如傷風感冒等，就算食藥都可以繼續餵母乳，原因係BB有抗體。雖然餵人奶能夠幫助BB強化身體，不過喺發緊燒同食緊藥期間，媽媽最好先暫停餵母乳，問咗醫生建議，睇吓啲藥嘅成份以及身體狀況，先再決定應唔應該繼續。

2. 有不良習慣
如果有不良嗜好嘅媽媽，就要考慮吓餵唔餵母乳啦。例如吸煙、酗酒等，最好真係唔好餵人奶，呢啲壞習慣一嚟會減少母乳分泌，同時亦會透過母乳將尼古丁等「毒素」傳入BB身體，嚴重影響佢哋發育。

Photo from MamiDaily

3. 情緒不穩
好多媽媽生完BB後，情緒都有不穩定嘅時候。喺咁大壓力嘅情況下，如果仲強逼自己餵母乳嘅話，不但解決唔到情緒問題，仲有機會影響到BB，最後或演變成唔能夠盡媽媽嘅責任，照顧唔到孩子。各位媽媽唔使畀太大壓力自己，應先放鬆心情，再考慮其他事情。

4. 乳頭受傷
BB埋身飲人奶嘅時候，乳頭有啲痛其寶好正常亦好普遍。不過如果喺餵哺過程中，持續一段日子都覺得乳頭好痛，就應該盡快睇醫生。另外，如果餵人奶時畀BB咬傷乳頭，甚至出血嘅話，最好先暫停餵母乳，避免傷口惡化，或有機會導致細菌感染。

Photo from MamiDaily

以上都係畀母乳媽媽嘅小小建議，人人身體情況都唔同，如果有疑問，最好都係搵醫生聽吓專業嘅意見啦！

Text：Mami Editorial