【各位媽媽 麻煩放手給爸爸好嗎？】

最近發生好多事，有時我會諗... 如果有一日，我走左，得返蠔豉妹妹同爸爸搞唔搞得掂呢？好多時，係華人社會，媽媽去照顧小朋友好似係一件理所當然嘅事。

爸爸去照顧小朋友就好似有光環一樣...

但對我黎講，如果小朋友係雙方決定要生的話，咁以上情況就唔成立了。

不過，容我講句心底話。 好多時媽媽比爸爸付出多，並唔係因為爸爸對小朋友既愛比媽媽少...

而係，媽媽自己攬晒上身，唔願放手...

曾經我都係一個咁既新手媽媽，因為餵哺母乳，所以蠔豉妹妹痴我就更加明顯。

夜奶呢件事，對我係一個折磨，但我見老公第二日要返工，我就一直死撐...

到有一日，我忍唔住爆喊，我覺得好攰...

我覺得我湊左全日女咁攰，我老公竟然唔幫手、唔起身！

我忍唔住一路喊一路鬧老公

當我冷靜返之後，我發現，原來係因為我之前話 「我搞得掂！無問題，你去瞓啦~」

就係呢句，我自己捱到崩潰...

其實，老公並唔係唔想幫，而係佢信我真係搞得掂！

(雖然係我自己開個頭衰，但嗰下真係好想反老公眼...)

所以當時我地就決定星期四-六嘅零晨交俾老公！

星期日-三既零晨就我負責~

而且，因為我工作關係，有時星期六、日都要返工~

工人姐姐又放假，所以就係爸爸出場，一腳踢嘅時間！

甚至我掉低蠔豉妹妹、老公，同fd旅行，蠔豉爸爸都搞得掂！

就係因為佢久唔久會自己一腳踢，所以好明白照顧小朋友有幾辛苦...

雖然男士既父愛可能會比女士既母愛含蓄，但唔代表佢地能力不足，好多時只係訓練時間唔夠~

無一個人天生會識得照顧BB、識得無條件咁去愛。

但時間會令人成長，每一次既照顧，都係一個練習， practice makes perfect

我從來都唔係一個好媽媽、好老婆，但我相信時間會令大家變得更好，只要堅持就一定可以~

各位爸爸、媽媽，加油！

Facebook : 80後的人妻「旅」友  &  蠔豉妹妹之貓奴生活
Instagram : https://www.instagram.com/wingring
合作／邀稿 : [email protected] / [email protected]

＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝

Text & Photos：Pig Wing

【誠徵Bloggers！】想分享你的懷孕及育兒日常？請將投稿連同約40字個人簡介和近照一張，電郵到：[email protected] 我們會幫你開設個人專欄，文章經編輯部潤飾後更有機會刊登在FB專頁，快點踴躍投稿吧！