孩子之間嗌交好煩?家長必睇3大好處+4個處理方法

孩子之間嗌交好煩?家長必睇3大好處+4個處理方法

mami熱話
ByCircle on 09 Aug 2019 Digital Editor

只要有多過兩個小朋友同場,不論幾多歲都好,佢哋好大機會都會嗌交,小至搶玩具、食物,大至爭寵、大打出手都有可能!遇到呢啲情況時,家長唔好覺得心煩氣躁就大事化小、小事化無,反而應該從中教導佢哋正確嘅吵架方法。

MamiDaily
Photo from MamiDaily

小朋友吵架係正常不過嘅事,而且有以下幾個好處:

1. 學習與人相處
兩個小朋友走埋一齊,就正正係與人認識嘅第一步。而吵架絕對係成長過程中重要嘅一部份,佢哋喺爭吵嘅過程中,慢慢學習同對方相處,對佢哋日後認識朋友有一定嘅幫助。

2. 提升談判能力
小朋友一般都係為咗「想要嘅嘢」而嘈交,好似係「覺得對方嘅食物好食啲」、「人哋嘅玩具好玩啲」咁,好多時佢哋只係想爭取自己想要嘅嘢。喺嗌交嘅過程中,佢哋能夠喺短時間內學習到談判技巧,從而獲得自己心目中嘅結果。

MamiDaily
Photo from MamiDaily

3. 教會孩子同理心
兩個人嗌交,其中一方實有不滿。家長事後可以同小朋友提出一啲問題,例如同佢哋講:「媽媽依家明白你好唔開心同嬲,但係你咁樣做嘅話,嗰個小朋友會有咩感受啊?」等佢哋企喺對方嘅角度思考,從而教識佢哋同理心嘅重要性。

咁如果小朋友經常嘈交,父母又可以點樣從中幫手處理紛爭呢?

廣告
廣告

1. 唔好隨便干預
好多時父母為咗唔好煩,就打算快快手叫小朋友唔好嘈就解決咗件事。事實上,小朋友吵架時,家長最好喺旁邊默默留意事情發展,唔好隨便干預佢哋就係最好嘅解決方法。小朋友嘅事由小朋友自己搞掂,家長唔好剝奪佢哋學習嘅機會。

2. 保持中立、冷靜
家長應該要注意情緒,保持冷靜。同時亦要保持中立,唔好因為係自己嘅仔女就偏幫佢哋,應該理性分析,根據發生嘅事做判斷。

MamiDaily
Photo from MamiDaily

3. 幾時介入?
一般普通嘅吵鬧,家長唔使幫小朋友解決。不過如果佢哋喺爭吵嘅過程中,情感上同身體上受到傷害嘅話,家長就要插手喇!

4. 教導小朋友點樣「正確吵架」
每次佢哋要嗌交嘅時候,家長交畀小朋友自己解決,並告知佢哋吵架嘅正確次序。首先,大家輪流冷靜地講出自己嘅諗法同感受,其他人唔可以插嘴,只可以細心聆聽。然後就叫佢哋開始協商,並要商量好以後遇到同樣嘅事情嘅做法。最後就同家長報告佢哋討論嘅結果。

MamiDaily
Photo from MamiDaily

Text:Mami Editorial

Share to Facebook