【注意】6種兒童玩具 潛在危機!

【注意】6種兒童玩具 潛在危機!

mami熱話
ByJacqueline on 07 Aug 2019 Senior Editor

意外雖然唔可能完全避免,但係可以預防。平時畀小朋友玩嘅玩具,有啲其實可能暗藏住危機,而家長又未有留意,好容易就會發生意外。以下幾款玩具,買之前一定要加倍注意!

1. 塑膠鴨

好多家長都會買呢款小黃鴨,放喺水中陪小朋友一齊沖涼。呢啲小黃鴨唔單止容易滋生細菌,仲有機會損害健康,導致兒童性早熟。當小黃鴨遇到熱水或沐浴液等油性物質時,好容易會釋出塑化劑。若小朋友放入口咬,更會嚴重損害健康。

MamiDaily
Photo from MamiDaily

2. 氣球

色彩繽紛、印上圖案嘅氣球受得小朋友歡迎。睇落冇乜攻擊性,但其實殺傷力可以好大,甚至足以致命。過往曾經有多宗氣球意外,氣球突然爆破,碎片直插喉嚨,導致窒息。

shutterstock
Photo from shutterstock

3. 水槍

一到夏天,好多家長都會帶小朋友去沙灘嬉水,大人細路都鐘意拎住支水槍四圍射。唔好睇少水槍嘅威力,射中眼分分鐘會盲!曾有測試顯示,水槍噴出嘅水柱,可以將5張A4紙瞬間射穿,殺傷力極大。

廣告
廣告

4. 絨毛公仔

放喺小朋友床上,陪佢哋瞓覺嘅絨毛公仔,都存在危險。絨毛公仔可能會引起呼吸問題,而小朋友喺瞓覺嘅時候,若唔小心被絨毛公仔壓住,更可能會導致猝死。

5. 電池玩具

好多玩具都需要用電池,小朋友可能會自行拆下電池,放入口中,唔小心吞咗落肚。而電池隨住食道蠕動,持續放電,好容易會導致灼傷,令食道及胃部受傷。

Mamidaily
Photo from Mamidaily

MamiDaily
Photo from MamiDaily

6. 指尖陀螺

呢款指尖陀螺,曾風靡一時,大人細路都拎住一個,轉下轉下,睇落都幾治癒。不過,美國就將呢個指尖陀螺列為危險玩具。原因係當指尖陀螺拆解後,有好多細小零件,小朋友容易誤食。另外,亦有研究指出,指尖陀螺會分散小朋友注意力,影響學習。

Text:Mami Editorial

Share to Facebook