預備懷孕！老公必戒4個壞習慣

好多女士為咗生BB，都會花好長時間調理身體。但其實生BB係兩公婆嘅事，並非單靠其中一方就可以成事。所以除咗老婆要做好準備，老公都需要戒掉壞習慣，建立良好嘅生活模式，先會更易「一擊即中」！

Photo from MamiDaily

1. 飲食習慣

避免進食煎炸、高脂肪、高糖、高鹽食物，唔健康又冇營養價值。如要備孕，男女雙方都必須做到均衡飲食，攝取足夠營養。例如男方可多食含鋅食物，有助保護前列腺。

Photo from MamiDaily

2. 多做運動

唔好以為只有女士需要控制體重，其實男士肥胖亦會減低伴侶懷孕嘅機會。所以準爸爸都要多做運動，進行體重管理。最理想為每星期累積最少150分鐘嘅帶氧體能活動。另外，亦可改變一下生活習慣，如外出時乘坐公共交通工具，可提早1個站落車，並急步行到目的地，或以行樓梯代替搭電梯。

Photo from MamiDaily

3. 戒煙、酒

如果準爸爸嗜煙、酒，會增加患前列腺炎，甚至前列腺癌嘅風險，影響精子嘅健康，不利成孕。如果父母唔戒煙、酒，將來都會影響BB發育成長。

4. 調節心態

心態好重要，要知道並非每對夫婦都能夠「一擊即中」。即使未能成功懷孕，都唔好感到灰心，唔好畀壓力、甚至責怪自己或另一半。應該抱住順其自然嘅心態，放鬆心情更易成功。

Text：Mami Editorial