BB搞破壞好曳？其實係智力發展中！

照顧囝囝囡囡某程度上係一件好開心嘅事，可惜自從佢哋愈學愈多嘢，明白嘅事情愈多，佢哋就愈識搞破壞。日日見證住佢哋啲頑皮事，有時真係攰到冇力再叫停佢哋！不過，媽媽唔使氣餒住，因為BB愈大愈曳曳，其實可能係智力發展中。如果正經歷以下呢4件事，媽媽就唔使擔心住啦！

Photo from MamiDaily

1. 假喊
有時大人忙緊做緊嘢，BB見冇人同自己玩，就會諗辦法引人注意。而假喊就係佢哋最常用嘅手法！佢哋假喊其實係思考過先做嘅，透過呢個行為一來可以測試父母嘅反應，睇吓自己喊嘅時候會唔會受到關注，二來又可以分散佢哋嘅注意力，仲可以表達自己被忽視嘅不滿！又真係幾叻仔叻女～

2. 食手指
BB無時無刻都鍾意吮手指，原來佢哋開始食手指係智力發展嘅信號。呢個行為可以刺激大腦發展，又可以透過吸吮嘅動作安撫自己，所以食手指嘅BB可能會愈食愈聰明！

Photo from MamiDaily

3. 拆玩具
BB大到去一個程度後，就唔再係玩玩具，而係開始拆玩具。呢個係大腦發展嘅訊號，小朋友會將任何可以拆得到落嚟嘅零件都拆晒落嚟，有時亦會將佢哋砌返好。雖然玩具就好快要買過啲新，不過呢個舉動唔係搞破壞咁簡單，絕對可以訓練小朋友思考同幫助腦部發展！

4. 用剪刀、安全刀
當小朋友大個仔，見到大人用一啲佢哋未用過嘅利器時，佢哋會開始想學習點用呢啲「只有大人可以用」嘅工具。爸爸媽媽可以買一啲小朋友專用嘅安全剪刀或刀，畀佢哋可以候大人嘅小幫手，幫手切吓水果、剪下紙咁！父母見到佢哋拎呢啲工具時，唔使大驚小怪，反而可以從旁協助佢哋。

Photo from MamiDaily

Text：Mami Editorial