媽媽買6張車票 畀小朋友瞓覺 網民斥︰用錢霸位

日前，喺黑龍江哈爾濱發生咗一宗「霸位」事件。一位帶住兩個小朋友嘅媽媽，因為買唔到長途火車嘅臥鋪，於是買咗6張硬座連位嘅車栗，畀小朋友瞓低休息。此舉引起一番爭議。

網上流傳一段影片，指喺一架哈爾濱列車上，有一位媽媽帶住兩個小朋友瞓喺硬座位置，結果被多名乘客圍攻，怒斥佢霸位。該名媽媽即時展示出6張車票，並向在場乘客解釋，自己係因為買唔到卧鋪，所以先會咁做。

Photo from MamiDaily

而喺現場亦有其他乘客透露，呢位媽媽「人挺好」，雖然買咗6張車票，但都有讓座畀其他乘客，直至後來因為小朋友真係太攰，需要休息嘅關係，先冇再讓座畀其他乘客。後來其他無座嘅乘客見到，就開始質疑佢霸位，引起罵戰。

事件引起大批網民討論，有網民認為媽媽「用錢霸位」，亦有部分網民認為媽媽嘅行為並冇問題，因媽媽真金白銀買咗6張車票，座位理所當然係佢，唔可以話佢霸位。又有網民認為應該要有同情心，指做媽媽並不容易，一個人帶住兩個小朋友，叫大家體諒一下。另外，亦有網民質疑，火車嘅車票係實名制，媽媽係點樣買到6張車票。

其後，內地鐵路部門亦就此作出回應，指媽媽帶住兩個小朋友，如果買咗1張成人票、5張小童票，佢哋係唔需要票、證、人一致，仍然可以享有使用該6個座位嘅權利。但後來內地媒體又再查證，發現依照國家規定，火車票實行實名制，喺查票時，會同時核對旅客、所持車票及票面所載有效身份證件原件。如果票、證、人不一致，均會當作無票處理。

Text：Mami Editorial