老婆最討厭老公的5大行為 中幾多項？

一日24小時都唔夠用，相信依句說話，每個媽媽都好有同感。又要湊小朋友，又要處理家頭細務。老公返到屋企又不聞不理，又唔肯幫手分擔，媽媽們真係會好頭痛！以下行為，真係好易觸怒媽媽，各位爸爸要注意啦！

Photo from MamiDaily

1. 收工變皇帝

覺得自己為咗頭家，辛苦咗全日，收工返到屋企，乜都唔理又唔做，等老婆伺候自己。其實老婆都好多嘢做，分分鐘仲攰過返工。老公們請設身處地，體諒一下老婆，畢竟一個家庭係需要兩人一齊努力維繫的。

Photo from MamiDaily

2. 管教方式不一致

作為父母，兩公婆對子女應該要有共同嘅管教方式同理念。一齊訂立嘅規矩，就應該一齊執行，千祈唔好破壞。例如媽媽唔畀小朋友睇電視，爸爸就去開電視同小朋友一齊睇。呢啲行為不但令夫妻關係變差，更會寵壞小朋友。

3. 只顧瞓覺

新手父母最常出現，BB半夜哭喊，要幫佢哋換片、餵奶等。依段日子通常都唔會有覺好瞓，不過就算BB幾嘈都好，老公都好似完全「免疫」咁，一直處於熟睡狀態，結果每次都係媽媽一個人頂硬上，起身照顧BB。

4. 家人大過天

結婚後，好多人都會面對「婆媳關係」問題。老爺奶奶同媽媽嘅思想、處事方式不一，好容易出現爭執。依啲時候，老公往往都只會叫老婆忍讓一下，順應老人家嘅意思，甚至幫手一齊指責老婆。眼見老公唔肯企喺自己嗰邊，感覺真係唔好受。

5. 冇手尾 啲嘢周圍擺

收工返嚟，衫褲鞋襪四圍放，用完啲嘢又唔擺返喺原位。媽媽忙足全日，仲要不停幫老公執手尾。

Photo from MamiDaily

Text：Mami Editorial