多啲眼神交流 父母BB腦波或更同步

好多時BB一個眼神，媽媽就知佢想做咩！原來唔係心有靈犀咁簡單，仲有科學根據㖭？近日一項研究指出，同BB多作眼神交流，有助同步腦波，咁父母就唔使再驚BB唔知想點啦！

Photo from MamiDaily

一項刊登喺美國國家科學院院刊、由劍橋大學Baby-LINC實驗室負責嘅研究，探討嬰兒可唔可以將佢哋嘅腦波同成年人同步，以及眼神接觸會否有影響。研究人員邀請咗36個未滿1歲嘅嬰兒參與，將佢哋分成兩組，並使用腦電圖進行腦波模式檢查，最後將佢哋嘅大腦活動同向BB唱兒歌嘅成年人進行比較。

Photo from MamiDaily

喺第一組嘅實驗中，研究人員將事先已錄影嘅影片播畀BB睇。喺片段中唱兒歌嘅成年人直接望住BB，及後避開BB嘅目光，最後再斜視著BB。結果發現，當成年人嘅視線同BB嘅相遇時，兩人嘅腦波會慢慢同步。而喺斜視著BB嘅嗰一刻，兩人嘅腦波同步反應竟然係最強烈！研究人員指，BB或認為係成年人向佢發出想溝通嘅訊號。

喺第二組嘅實驗中，研究人員安排成年人同BB面對面進行實驗。同樣係由成年人唱兒歌畀BB聽，眼神一樣係先直視，後迴避，最後則斜視著BB。結果顯示，兩人對望時，腦波更加同步。今次就算成年人冇望住BB，佢哋嘅腦波依然繼續同步冇斷開！研究人員解釋，腦波之所以同步唔係因為BB望到你個樣，或者覺得有趣，而係因為佢有意圖想同你溝通！

Photo from MamiDaily

負責呢項研究嘅博士Victoria Leong指，成年人同BB互相望住對方嘅時候，代表佢哋發出緊想溝通嘅訊號！兩者嘅腦波愈同步，能夠令父母知道咩時候同BB交流更好，可以令BB嘅學習更效！

Text：Mami Editorial