【危險】帶BB游水 7大注意事項

夏天熱辣辣，唔少家長都已經出動，開始帶BB去玩水。無論係去沙灘定泳池，家長都一定要提高警覺。睇少眼都隨時會有意外發生。以下幾點一定要注意！

Photo from MamiDaily

1. 畀BB落水前，一定要確保水嘅溫度唔會太凍。落到水後，要留意下BB嘅體溫，如果嘴唇、手腳變紫或身體不停抖顫，就要馬上帶BB離開水面。

2. 仲未戒片嘅BB好易會喺水中大小便，由於普通尿片遇水後會發脹變大、變重，所以家長應為BB準備游水專用尿片。

3. 如果帶BB去泳池，一定要留意下泳池嘅味道。如果家長聞到泳池有濃郁嘅氯氣，就要注意，可能係同泳池消毒工作做得唔夠徹底有關。

4. BB落到水，可能會感到驚慌不安，家長一定要同BB保持眼神交流、帶埋BB平時沖涼嘅玩具畀佢哋玩，增加安全感，令BB放鬆心情。

5. BB上水後要注意保暖，家長應先幫BB抹乾身體，再穿上浴袍，避免著涼。

6. 上水後，家長應馬上幫BB徹底沖身，耳仔同鼻孔亦要用棉球擦乾。

7. 好多家長會為BB準備頸圈，但其實頸圈暗藏危機。除咗有機會漏氣，令BB遇溺外，更有機會因太緊，而壓住BB嘅氣管、頸動脈，令BB出現心率減慢，嚴重甚至窒息。

Text：Mami Editorial