唔想小朋友大得咁快！6個證明BB成長嘅瞬間

做咗媽媽後，好想無時無刻都陪住BB！小朋友每一日都好似大咗啲，而佢哋成長嘅每一個時光都非常珍貴。由手抱BB成為識行識跑嘅小朋友其實只係一、兩年嘅事，爸爸媽媽自然期望每個「第一次」都可以陪伴在旁，以下6個證明BB成長嘅瞬間相信各位父母一定非常不捨！

Photo from MamiDaily

1. 出牙仔
出咗第一隻牙仔，係BB開始成長嘅標記。BB一般喺6至10個月之間開始出牙，同時亦係開始進食固體食物嘅時機。愈食愈多嘢，吸收更多營養，自然又會繼續長高啦！

2. 識對答
由識得發音後，原來BB好快可以用簡單嘅字詞表達意思，然後佢哋又好快就會聽得明爸爸媽媽同佢講嘅嘢。過多一排，佢哋好快就識得同大人對答！其實只不過係一段好短嘅時間，已經有咁大進步，嗰一刻真係會突然好感觸！

Photo from MamiDaily

3. 唔使再用BB車
小朋友大得快，手抱BB嘅階段真係好短！唔夠一年已經學識行路，好快出街都唔使再帶BB車！拖住BB行都係一種樂趣～ 雖然有時真係跑得好快捉唔住。

4. 多要求
識行識走之後，BB開始識得叫爸爸媽媽買玩具、買嘢食！出街嘅時候，行過唔同鋪頭見到想要嘅嘢，都會要求大人買畀佢。大個仔啦真係⋯

Photo from MamiDaily

5. 分床瞓覺
BB唔止唔鍾意瞓BB床，仲好鍾意同父母孖鋪！隨住BB慢慢成長，父母都要狠心啲同佢哋分開瞓。一開始BB係會好抗拒，不過只要堅持多一段時間，佢哋會習慣自己瞓一張床，到時就變成父母唔捨得啦！

6. 著校服
雖然好多媽媽都選擇帶小朋友返play group，不過當正式買校服讀書嘅時候，真係不禁概嘆時間過得好快。見住佢著校服、揹住書包離開自己，真係大個仔大個女啦！

Photo from MamiDaily

好唔捨得仔女大得咁快啊！各位爸爸媽媽真係要花多啲時間陪佢哋，錯過以上任何一個時刻，第時肯定會後悔㗎！

Text：Mami Editorial