坐高鐵遊桂林!享受4日3夜親子小旅行 共創暑假歡樂時光!

坐高鐵遊桂林!享受4日3夜親子小旅行 共創暑假歡樂時光!

親子玩樂
Byivory.yuen on 07 Aug 2019

暑假帶小朋友去旅行係指定動作,可以畀機會佢哋增廣見聞放下電二嚟梗係製造屬於一家人嘅美好回憶啦!

次次都係搭飛機,今年不如搞搞新意思,搭高鐵去桂林,親歷奇景玩戶外活動,又可以試下製作傳統工藝靜靜雞講你知,去桂林搭高鐵其實好划算。時間方面,由香港西九龍站出發,只需大概三個多小時;車費方面,成人來回票價大概港幣$860*,小童身高120-150cm約為成人車費半價,身高唔夠120cm嘅仲可以免費添!係咪立即心郁郁想出發呢?知你湊住小朋友冇時間Plan行程唔使擔心,已經幫你plan4日3夜行程,等你輕輕鬆鬆就可以隨時坐高鐵出發玩個飽咯!畀個貼士你,如果你揸車去香港西九龍站轉乘高鐵,可享泊車轉乘優惠,喺車站內泊車,每日只需港幣$100咋!

PressLogic
Photo from MamiDaily

第一日:香港出發+Check in 酒店+晚餐+睇桂林兩江四湖夜景

每日有兩班車由香港西九龍站去桂林西站,分別係12:05同14:53分出發 ,車程大概3個幾鐘,搭早啲嗰班車,大約3點25分就到達桂林西站*。

湊住小朋友,梗係要搵間方便、地方乾淨企理嘅酒店啦!市中心嘅桂林香格里拉大酒店,房間乾淨寬敞,而且坐落灕江旁邊,可以眺望灕江靚景,入面仲有兒童俱樂部、有機農場、遊戲休息室同迷你動物園,啱晒一家大細嚟住!喺桂林西站搭的士,大約25分鐘就到。

桂林香格里拉大酒店官網
Photo from 桂林香格里拉大酒店官網

桂林香格里拉大酒店
地址:中國廣西桂林市環城北二路111號

放好行李,安頓晒所有嘢之後,就可以一齊出去食晚餐。小編知道桂林市中心有條叫「尚水美食街」,裡面美食「多籮籮」,有啤酒魚、燒蠔等,而且價廉物美添~嗰度仲有玩具街,食完飯帶小朋友去買玩具,一定可以令佢地樂而忘返啊!

MamiDaily
Photo from MamiDaily

MamiDaily
Photo from MamiDaily

尚水美食街
地址:廣西桂林正陽步行街

食完飯就可以同小朋友行去附近嘅「兩江四湖」,佢將「灕江」、「桃花江」、「木龍湖」(含鐵佛塘)、「桂湖」、「榕湖」、「杉湖」貫通,大家可以坐住船仔一次過遊覽曬咁多著名景點,仲睇到岸邊嘅日月塔,五光十色嘅燈光同佢互相映襯~咁嘅夜景真係非常壯觀!欣賞完就差唔多時間,返酒店梳洗休息啦~

PressLogic
Photo from MamiDaily

兩江四湖
地址:廣西省桂林市象山區兩江四湖景區

第二日:灕水人家 (做手工)+遇龍河景區+陽朔西街

喺酒店食完早餐就搭的士出發去「灕水人家」,一齊體驗桂北民俗風情,車程約40分鐘。

灕水人家係一條遠離城市嘅村落。入面保留住舊時村落嘅文化,有唔少嘅傳統手工藝。喺呢度,你可以自己落手落腳磨豆漿同試飲自己磨嘅豆漿、手扯腐竹、自己製作陶藝等,畀小朋友試過親手製造,知道凡事得來不易,從而學識珍惜依家擁有嘅食物同事物。

灕水人家官網
Photo from 灕水人家官網

灕水人家
地址:桂林市靈川縣大圩鎮灕水人家
營業時間:早上 9:00 至下午 5:00

玩完手工藝,食個午餐,之後就坐的士,搭75分鐘車去「遇龍河景區」。有人話,遇龍河係世界十大最靚景色之一,係桂林地區最大同最無添加嘅山水園地人生一定要去一次!當地人介紹我哋坐住竹筏過河,乘坐時間大概個半鐘至兩個鐘左右。沿路景色優美,兩岸滿翠綠山嶺,空氣非常清新,非常愜意。嗰度嘅水流比較平緩,唔使擔心安全問題。不過大家都要留意天氣,天氣唔好就盡量避免玩水上活動啦~

PressLogic
Photo from MamiDaily

遇龍河景區
地址:桂林市陽朔縣白沙鎮遇龍村

遊覽完湖光山色,又可以搭金寶中巴車到附近嘅陽朔西街行吓、食吓嘢~陽朔西街係桂林出名必逛、買手信必到嘅地方,非常熱鬧!嗰度仲有好多美食任你揀~你可以去試「重慶小麵」,當地人非常推薦佢嘅叉燒燒鵝肉醬飯只係25¥一份,大份又抵食,仲兼顧到小朋友嘅口味添!

PressLogic
Photo from MamiDaily

食完嘢就係時候行街買手信。桂林嘅桂花糕、桂花酥、桂花茶等都係必買嘅特色手信。有晒目標,小朋友就唔會因為行得耐而扭計啦!

陽朔西街
地址:桂林市陽朔縣益田西街岩院 118 號

第三日:冠岩景區 + 古東瀑布

街又行咗、手工又做咗,去到第三日梗係要帶細路去玩啲刺激啲嘅嘢啦!推薦去冠岩景區,搭的士由酒店前往約需1小時車程。你哋可以透過唔同方式入岩洞,例如搭小火車、坐船仔、仲有搭觀光電梯、兩人座位嘅電動自控軌道車等等,非常有趣。走入岩洞,你會見到唔少石筍同一啲鐘乳石,再加埋七彩顏色嘅燈光映襯下,更為壯觀。

PressLogic
Photo from MamiDaily

冠岩景區官網
Photo from 冠岩景區官網

冠岩景區
地址:桂林市雁山區草坪鄉草坪街
開放時間:8:30-17:30(全程游覽需2小時)

欣賞完鐘乳石,就可以搭的士去古東瀑布,大概20分鐘車程。去到可以享受喺瀑布行走嘅樂趣,仲可以體會喺叢林穿梭嘅快感,小朋友一定鍾意!瀑布分兩段,第一段較高,攀爬較具挑戰性,景區建議小朋友由第二段開始,做足安全措施就無問題~爬完瀑布可以行返落山,有石級,唔會好難行。仲有得玩古東滑道,畀小朋友穿梭叢林之間,感受刺激快感!整個過程好玩安全,非常推薦爸爸媽媽帶小朋友去啊!!

灕江古東景區官網
Photo from 灕江古東景區官網

古東瀑布
地址:桂林市靈川縣大圩古鎮古東瀑布
開放時間:上午 9:00 至下午 5:00

第四日:遊江畔+回港

灕江貫穿桂林市,沿江兩邊有唔少著名景點,如象鼻山、伏波山等,早餐後可以喺酒店附近散散步,爭取回港前同小朋友欣賞桂林獨特嘅靚景。

港鐵公司
Photo from 港鐵公司

返酒店拎返行李之後就要起程返香港啦~每日有兩班高鐵駛經桂林西站回港,較晏嘅一班為1:36pm,5點前返到香港*!

希望大家都可以同自己嘅小朋友開開心心坐高鐵遊桂林,共享天倫,留下更多屬於你哋嘅美好時光!

*2019年8月發佈之行車時間表作參考。

Presented by: 港鐵公司

Share to Facebook