【QE順產27小時全記錄（中）】

By 包媽雲妮 on 20 Jul 2019

穿水見紅定陣痛先？等足估足9個月，原來包包揀咗穿水做準備出世嘅SIGNAL~~

上回講到穿水後首12個鐘嘅情況，有朋友問點解我可以咁清楚記低時間，因為當時喺產前房只有自己一個人，老公要探病時間先可以陪喺身邊，所以一有新動向就用手機MARK低，不過嚟到呢一篇時間就開始模糊，因為真正要開始打大佬啦﹗

6點幾跪求姑娘CHECK度數不果，真係成個人無晒心機，老公陪我去努力UN BALL希望度數可以快啲開

到8點探病時間完結，佢又要走啦得返我一個T.T之後開始愈痛愈勁，每次痛條腰好似就斷咁。。。

2125有位好好人嘅黃姑娘嚟度bb心跳，剛好我正在陣痛，佢主動話幫我check下，嗰一刻簡直覺得佢係天使一樣﹗不過宮頸都係未開佢話仲好厚但起碼叫有人理下自己。check完宮頸，m巾，褲同床墊都濕晒，2140去完廁所換褲同m巾，想起身3次都撞正陣痛又走唔到。。。返到床好人黃姑娘拎咗個電擊鎮痛機俾我好感動

2230隔離房有媽媽落得產房啦醫生幫佢check完經過，話幫我種鹽水豆先，因為頭先check宮頸未開，穿水24小時要打抗生素&好大機會都要催生佢預我典到穿水24小時即係6點幾。。。仲有八個鐘點捱呀！陣痛之間我就嚟秒暈啦…

0055痛到入廁所嘔胃酸，有個惡姑娘入廁所話：「都叫你唔好咁呼吸會嘔囉﹗」淨係叫我鼻吸口呼，同埋俾2個嘔吐袋過多15分鐘黃姑娘幫我check，宮頸都係未開我頂唔順啦申請止痛針，已經24個鐘無瞓，再係咁我都無力生啦0148打咗止痛針等藥力發作已經有傳說中想生嘅SIGNAL --- 一直想去便便嘅感覺，但宮頸呢一刻都係完全未開，痛到神智開始唔清醒，開始擔心會食全餐，情緒真係好崩潰T.T

0349止痛針藥力發作，有瞓到一陣，但不停有便意勁痛就痛醒，再無限輪迴。。。姑娘檢查咗話bb頭低係正常，但仲未完全開，叫我等到6點幾夠24小時，打抗生素加上產房催生……止痛針藥力慢慢消退，痛嘅感覺亦愈來愈強烈，一直都努力忍住唔嗌怕嘈到其他媽媽，但開始忍唔到要低聲嗚嗚咁叫……

預咗6點幾夠24小時可以落產房催生，0515趁陣痛之間嘅少少時間打定俾老公，叫佢準備嚟醫院。點知收線無耐，自己開始痛到失控大嗌，聲量大到應該護士站都聽到，即刻有姑娘衝嚟幫我檢查，終於可以落產房啦！

0529再打一次俾老公話落得去然後忍痛過床，有姐姐幫手將個人物品仲有檯面嘅暖水瓶、麵包等掃晒落床邊(所以話喺產前房真係唔好放晒啲嘢出嚟)，就即刻推我去產房。真係好似睇電視咁，一邊望住天花嘅燈走馬燈般走過，被推入LIFT再推入產房

落到去產房好多身穿手術袍嘅人忙東忙西，老公隔一陣6點前就趕到，檢查先知原來已經開咗7度﹗﹗﹗姑娘交帶落點用笑氣面罩就離開，面前有個大鐘，即使我要吸笑氣除低眼鏡，都大約知道時間。好多時得我同老公2個人喺度，雖然痛楚愈來愈恐怖，但終於可以捉住老公隻手，個心總算定啲。

陣痛與陣痛之間我休克咗幾次，之後又痛醒無限loop⋯⋯⋯有人話呢種痛好似俾泥頭車輾過，或者10條肋骨一齊斷晒，我就覺得係更加恐怖，因為痛起嚟伴隨極度想便便嘅感覺，但又唔去得因為BB根本未夠位出嚟，格硬痾甚至會危害BB﹗

雖然痛到不停休克，但我並無好似電視劇咁大嗌「我要開刀」或者「我唔生啦」，因為明知講嚟都嘥氣（那來嘅理智呀……）不過我好記得自己問過老公一句：「我會唔會就咁痛到死架？」老公一直喺身邊無多餘嘅說話，只係俾隻手我捉住，痛緊嘅時候幫我戴好笑氣面罩，其實已經好足夠啦。

落咗產房三個幾鐘，到0930左右終於可以開始試生，SET好腳踏鋪好消毒墊後，有位明顯係資深肋產士入嚟。佢睇到我雙手戴住護腕，知道係筋膜炎後即刻應變，因為PUSH嘅時候正常雙手要握實扶手發力，但以我嘅情況雙手根本做唔到。古姑娘好堅，即刻教我用另一姿勢生，2邊手腕抱大脾，老公幫手喺頸後推

吸一大啖氣忍住十秒PUSH，試咗3，4次左右，姑娘同老公話每次都有進展，見到BB頭頂，個頭出左一半，打側啲等BB更啱位，最終都有剪一刀，終於，終於聽到包包嘅喊聲啦，好響亮好好聽。兩個人都無喊，同老公對望講咗句：「我咃個仔呀，終於見到包包啦﹗」而老公就捉住我隻手話：「辛苦你啦老婆﹗」老公剪咗臍帶，姑娘幫包包清潔完，就用相機幫我咃影低第一張全家福