必學！4個方法應付「冇手尾」老公

唔知「冇手尾」係咪男人嘅天性呢？眼見好多人妻嘅另一半都十分褦襶（音：呢啡），用完啲嘢唔放返原位、臭襪又亂咁放、去完廁所唔沖廁！有時屋企執好唔夠一日又亂糟糟，真係好激氣，最驚係阿B有樣學樣！所以一定要盡快用以下4招解決呢個問題，各位媽媽學嘢喇！

Photo from MamiDaily

第1招：寫Memo紙
首先喺各個高危位置貼告示，提示佢記得開完櫃筒要閂返、飲完水要放好個杯等等（真係數之不盡）！每次佢有啲咩冇做到，即刻寫張紙提佢，貼到全屋都係，仲有藉口唔執咩？！

第2招：忍手
見到老公嘅嘢周圍擺一定要忍住唔可以幫佢執！見到嘅時候就提佢兩句，但唔應該幫佢執手尾！如果你幫佢放返好嘅話，佢永遠唔會知間屋畀佢搞到有幾亂。

Photo from MamiDaily

第3招：賞罰分明
簡單易明：一捉到佢冇手尾，即刻罰錢！雖然見到間屋咁亂真係好躁，不過起碼都有啲「補償」安慰一下心靈。

第4招：以牙還牙
用咗以上幾招都無改善嘅話，就只可以出絕招：比佢更無手尾、更混亂！試吓搵啲兩個人嘅共用物品，呢度放啲、嗰度又放啲，總之就唔好擺喺原位！等佢想用嘅時候又搵唔到，身同感受嘅時候應該點都會有效嘅～

Photo from MamiDaily

Text：Mami Editorial