私處痕癢要小心！使用衛生巾 4個錯誤習慣

唔少女士喺經期期間，敏感部位特別容易過敏，私處更可能會出現痕癢、紅疹等情況。其實好大機會係因為衛生巾所致。以下幾個使用衛生巾習慣，大家一定要留意返！

Photo from MamiDaily

1. 換衛生巾前要洗手

相信每個人如廁後都會洗手，但其實去廁所前都應該要先洗手，特別係月經期間。由於雙手每日都會接觸到好多物件，有好多肉眼睇唔到嘅細菌。喺更換衛生巾時，少不免會接觸到衛生巾嘅棉層，如果冇洗手，細菌則有可能因此進入到私處。

2. 衛生巾愈厚愈安全？

好多人因為怕「漏M」，特別偏向揀一啲加厚或特長嘅衛生巾。但切記唔好過份依賴依類衛生巾，佢哋嘅透氣度可能畀普通衛生巾欠佳，相對較容易導致皮膚敏感，甚至滋生細菌。

3. 勤換衛生巾

千祈唔好嫌麻煩、或因太懶而不定時更換衛生巾，特別係經期即將結束嘅日子，覺得衛生巾唔係好污糟而不換。無論流量多或少，衛生巾每隔3小時左右就必須更換一次，以保持乾爽清潔。

4. 衛生巾放喺洗手間

相信好多人都會將衛生巾存放喺洗手間，方便使用。但由於大部分衛生巾嘅包裝都係不密封設計，容易撕開。而洗手間可謂全屋最潮濕嘅位置，擺喺洗手間好易令衛生巾嘅棉層吸入濕氣，增加滋生細菌嘅機會。

Text：Mami Editorial