踩中媽媽嘅地雷 跪玻璃都唔夠

「做人老婆甚艱難，做人媽媽仲困難」但依句說話好似好多人都唔係好明，就連自己老公都唔明！全職媽媽湊完小朋友成日後，仲有一大堆家事要處理；半職媽媽都唔係好好多，收工帶住半死身驅後，返到屋企仲要湊小朋友；相反，老公收完工就真係放工，有時仲要講一啲說話，一秒撻著老婆！

1. 「你今日成日做咩嚟？」

我今日做咩嚟？我都好想知我做咩嘢嚟呀！忙完成日幾乎無一日樣係自己嘅事，依種情況已經唔係一日半日嘅事，但老公竟然都會問出口，真係會好傷心！其實依句會撻著媽媽們，大多可能覺得對方忽視自己付出，好似一般不理解自己嘅人會問嘅問題，會有令自己有白白付出嘅感覺，其實可能講句「好采有你渣！」或「辛苦晒喇！」會更令媽媽有動力！

Photo from mamiDaily
2. 「小朋友瞓覺個陣就可以做嘢喇？」

小朋友尤其0-2歲時好多時都要陪瞓，有時仲可能係餵住一奶先瞓著，氹完一大輪先瞓得熟，但瞓又瞓唔耐而且又易醒，每次想偷偷行出去做嘢，可能都要慢慢做，而且時不時就要望下，做到，會有效率同做得好嗎？而且當佢起身就要陪玩湊住佢哋，如果小朋友乖乖地自己玩，但都唔可以離開自己視線，咁請大家想像，媽媽點樣可以雙眼望住BB，隻手就係到做其他嘢？

3. 「媽咪，我啲嘢呢？」／「媽咪，屋企啲嘢冇晒喇～」

依句說話係不知不覺加重對方負擔嘅說話。湊小朋友依門學問，絕對唔係可以掌握自己手中。BB都係人，每日都會有變化，雖然話就話「個個都係咁湊」但小朋友性格，身體又點會個個都一樣。當自己已經煩惱緊小朋友嘅事時，對方仲不斷問一啲要你幫忙嘅說話，真係會好大壓力，如果真係想知，可以轉成建議句子，可能會效果會不一樣呢～

Photo from mamiDaily

4.「我（爸爸）可以休息一下嗎？」
依句說話只會換來「How about me?」冇人天生係媽媽，媽媽都不斷學緊，壓力下都想有人可以幫忙，但換來就係連休息時間都冇，結果對方竟然話佢自己要休息，冇人幫都算，仲話比你聽佢要休息，得唔到體諒，仲被要求，感覺可能真係會好差～

5.「媽媽！BB喊喇！」／「去揾媽咪喇～」
聽到依啲說話，好多媽媽嘅反應都係：「個B係我一個人㗎？」既然係2人共組嘅家庭，2人都應該共同負責家務事，身邊人一定要戒掉依句說話，因為依句說話好令人覺得對方係到推卸責任呢～

Text & Photos：mamiDaily