【係咪一大拖住兩小好恰啲？2寶媽慘況實錄】

By 鯨魚家姐‧蝦子細佬媽媽 on 19 Jul 2019

鯨魚家姐‧蝦子細佬的雙職媽媽，忙於工作與教育孩子之間。天真無邪的兩姊弟既逗人歡樂，也惹人煩躁，一家人最喜愛玩樂，也熱衷郊遊，專門搜羅親子活動好去處、趣味郊遊路線、好玩的親子旅遊行程、分享育兒心得!

人善已經被人欺，如一大拖住兩小仲會被人恰獲金！鯨媽總覺得多一事不如少一事，大事化小，D衰野好快就會過去！我秉持呢個信念良久，但發覺被人恰情況持續，當我獨自一個拖住兩個小朋友時，出現次數更多！係咪啲人特別鐘意欺負弱小？尤其一大拖兩小！

有一次搭lift，本身有3-4個人係lift度，停到我那一層時，我就入lift並持續向後移動，讓更多人可以入lift，直至小腿撞到貨物就停下，然後有個送貨男人就立即出聲話:「你想非禮我啊？」本能反應即刻回佢sorry並向前移動......後來，我同朋友講返件事，佢地就話我傻，人多擠逼好正常，仲要撞到死物唔係男人，恨不得幫我出頭! 係囉，我明明係良家婦女來架，點會去非禮啫，只怪我怕事!

又有一日，我送兩小返學，因落雨同趕時間就去坐的士，正常係$24唔洗跳標就到，點知落車比錢時，司機就已經黑我面，仲問候我娘親，我O晒咀，究竟我做錯咩野! 我同自己講，應該係黑仔遇著個冇良司機啫，點知同樣情況係第二日又再次發生，但就係另一個司機，今次除左問候我娘親仲話仆街快L啲走，因為今次鯨魚蝦子未落車，嚇到佢地呆左，我又唔知咩事惹著司機，又唔想係小朋友面前同司機嘈交，最後都係急急腳走人算! 連續兩日遇到衰司機，怪自己黑仔之外，我覺得司機見我一拖二恰得就恰，因為唔會反駁唔會同佢癲!

又有一次，一拖二去茶記食野，入內向侍應表示3位，同步有個男人跟手表示1位，但那侍應無視我地，向那男人招手帶枱,跟手先走來問我幾位，大佬! 明明我來先，有咩理由唔係我地入座先?! 算數! 小朋友肚餓，我只好冇骨氣地坐低食野! 之後又有次去另一間茶記，本身想點咖哩飯食，但因為鯨魚蝦子唔食得辣，我就問個侍應隻咖哩辣唔辣，然後佢就好串咁點我冇咖哩唔辣架喎! 大佬，就係有咖哩唔辣，我先多口問句啫! 難道一拖二真係好恰啲?!