孩子表面愈乖 內心愈脆弱？

往往令父母最激心嘅就係小朋友曳曳唔聽人講，有時叫佢做呢樣，佢就偏唔做，仲要同自己唱反調，因此好多家長都好羨慕人哋有個乖仔乖女。不過原來小朋友過份乖巧唔係一件好事，反而令人非常擔憂！

Photo from MamiDaily

1. 只顧討好別人
喺小朋友嘅世界，得到爸爸媽媽嘅讚賞就係最高嘅榮譽。佢哋認為父母講啲咩都係正確嘅，有時就算父母問「想唔想食糖」、「想唔想買玩具」等，佢哋就算內心好想好想都唔敢話好，為咗做一個「乖孩子」而討好別人，抑壓真實嘅想法，努力做大人喜歡嘅孩子。

2. 善於將情緒隱藏
當小朋友愈乖，代表佢愈識得將情緒隱藏。佢哋知道要聽父母話，先可以得到稱讚。為咗令爸爸媽媽安心，就算佢哋就算好唔開心、好想喊、面對自己討厭嘅事，都唔會表現出嚟，因為成日哭鬧嘅小朋友會令父母好反感。

Photo from MamiDaily

3. 過份倚賴
一般乖孩子都只會聽從父母安排，無法增強思考能力！愈聽話嘅小朋友，自主能力愈低，長大後或會過份倚賴父母，無法獨立生活！

4. 容易患上心理疾病
由於從小開始就抑壓內心真實想法，久而久之變得沉默內向，好難有人知道乖孩子嘅感受。長大後，愈嚟愈多愁善感，容易感到孤獨，同時情緒亦易失控。乖孩子嘅心理健康需要多加注認，唔係患上抑鬱症、焦慮症等心理疾病嘅機會或會大增。

Photo from MamiDaily

Text：Mami Editorial