連性格都變埋？成為爸爸後嘅6個轉變

成日都話生完BB後，生活上會有好大轉變。除咗自己愈嚟愈忙之外，唔知大家覺唔覺做咗爸爸嘅另一半都有好大改變呢？各位媽媽有冇留意到佢哋以下6樣由性格到日常生活嘅轉變呢？

Photo from MamiDaily

1. 講嘢講多咗
平時沉默寡言嘅老公，自從一齊照顧BB後，開始好鍾意講嘢，咩都會問一餐，好似「啲奶飲得未啊？」、「尿片用晒未？」、「BB可以加固未？」等等。雖然話題係圍繞住BB，不過佢愈嚟愈多嘢講，大家有傾有講，兩公婆嘅交流亦因而多咗，絕對係一件好事！

2. 分享症
男人一向好少玩社交平台，不過唔知點解生咗BB之後，佢哋會開始同朋友分享仔女嘅日常。平時同BB一齊做咗啲咩都會post晒上網同朋友開心share，分分鐘出得post過媽媽，個帳號終於重見光明，真係可喜可賀！

Photo from MamiDaily

3. 趕返屋企
做咗爸爸真係唔同啲，好多時佢哋放工後都盡量早啲返屋企，同BB玩、陪佢食飯、幫佢沖涼等。BB大得好快，唔見一日可能已經高咗啲，又或者已經識轉身，所以爸爸專登抽多啲時間陪佢哋，咁就唔會錯過BB成長嘅重要時刻啦！

4. 任勞任怨
佢哋就算幾攰都好，一定會陪BB玩，或者話係畀佢哋玩，變成子女嘅玩具，真係好唔話得！有囡囡嘅爸爸，以前叫佢著裙扮靚靚一定唔肯，不過有女萬事足，依家個女叫佢搽唇膏都求之不得。

Photo from MamiDaily

5. 生活習慣
好多壞習慣都慢慢戒緊，少咗食煙、少咗買垃圾食物，生活變得健康咗。以前有時間都留返喺屋企打機瞓覺，依家用多咗時間買嘢畀BB，連行超市都會諗吓啲食物啱唔啱仔女食。

6. 有耐性
小朋友絕對係可以令爸爸變得有耐性！同BB一齊嘅時候，真係少啲耐性都會崩潰。餵佢哋食飯要慢慢?、聽佢哋講嘢要小心聆聽等等，對住小朋友真係唔捨得發脾氣。

Photo from MamiDaily

Text：Mami Editorial