【親子餐廳】一家大小都適合的石門西餐廳

平時我好少帶個仔出去食飯，始終佢太細個冇咁多耐性，所以想食餐好真係好難嘅事，次次食親都係快餐

知道沙田石門有一間親子友好嘅西餐廳好近馬鐵站，係京瑞廣場二期，即C出口直行（唔駛過馬路）安群街轉右，大約2分鐘就到，非常方便我推住嬰兒車過黎。

入面環境好大，坐位之間又唔迫，好適合帶小朋友黎食飯。因為早左黎(約6點9)，所以安排左好闊落嘅卡位俾我地，我地一家三口坐得好鬆動（孖吉已除左鞋）

晚餐Menu

唔想睇紙Menu，可以參考牆上睇下今日有咩廚師推介。

另一邊就有個師傅即開生蠔。生蠔仲做緊買一送一優惠，我都order左各一款試下先～

Drink List

小朋友都有Menu嫁，而且張menu正面同背面都可以玩，餐廳又提供蠟筆俾小朋友，真係岩晒坐唔定嘅孖吉慢慢畫呀。

睇圖已經覺得兒童餐好吸引嫁啦，出到黎真係一模一樣，孖吉見到已經忍唔住拎餐具搶住食。($68)

孖吉食飽飽啦，就到我地大人食囉。首先係做緊買一送一嘅法國生蠔。擺盤好有heart，有埋冰震住，左邊係Majestic($65)；右邊係Mermaid($68) ；

建議先食淡口嘅Mermaid，然後再食比較濃味嘅Majestic。生蠔好新鮮，有淡淡海水味，食2隻好似唔夠喉，好想再encore。

前菜：意大利帕馬火腿配哈密瓜($88)

Parma ham係我最愛，配合埋哈密瓜真係好好味，一咸一甜好夾。

主菜：軟殼蟹天婦羅乾蕃茄意粉($128)

軟殼蟹炸得好香脆，有2大舊，孖吉見到意粉又黎搶食，可想而之幾好味，食完又食。

主菜：加拿大有機有骨豬扒($188)

我平時麻麻地食豬扒，因為多數整得好嚡口，但依度整得岩岩好，好juicy，而且配菜份量都好多，薯仔又整得好味，所以我同老公都食得好飽。

甜品：燴車厘子金寶脆脆配雲呢拿雪糕($68)

依個甜品食得又玩得，連埋杯上嘅朱古力塊同下面d脆脆雪糕一齊撈埋，口感好特別，酸酸甜甜又脆脆咁，好醒神。

另外，如果叫套餐就會送一杯凍／暖菠蘿有機奇亞籽綠茶。單點($36)

最後，餐廳有部小型扭蛋機，孖吉食完去扭蛋蛋，拎左隻小飛機，佢開心到回程途中都拎住。

我見好多檯都叫依款原隻加拿大龍蝦意粉，真係好吸引，價錢都好優惠，下次有機會試下先～

下午茶時段同Tea Set Menu set都好抵～

我地食左差不多2個小時，因為有野食岩孖吉食，又有野俾佢玩，所以佢都可以乖乖坐定。而且食物質素很好，份量又多，價錢又合理，員工服務態度良好，我地一家三口都好滿意，個個都捧住個肚腩出黎。

Su Casa

地址：沙田石門安群街一號京瑞廣場二期地下G03號舖

電話：28825000

營業時間：星期一至日11:00 - 22:30

＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝

Text & Photos：孖吉的成長日誌

【誠徵Bloggers！】想分享你的懷孕及育兒日常？請將投稿連同約40字個人簡介和近照一張，電郵到： [email protected]，我們會幫你開設個人專欄，文章經編輯部潤飾後更有機會刊登在FB專頁，快點踴躍投稿吧！