【如何提升BB睡眠質素？3個步驟令寶寶瞓得好！】

Pbear 係出世一個月就已經成功戒咗夜奶，可以一覺瞓天光。好多人有問Ms Leely 究竟點樣可以提升BB睡眠質素？其實只要簡單三個步驟就可以令寶寶瞓得好！

Step 1 - 暖水浴

小寶寶玩咗一日成身汗，幫佢沖個暖水泡泡浴，就可以將BB平靜落嚟。Pbear 最鍾意洗白白，除咗可以玩下水之外，更加可以除咗條尿片，俾佢 Enjoy 下無拘無束嘅時候。沖完涼 Ms Leely 就會抱Pbear出黎，幫佢抹乾身，進行Step 2。

Step 2 - BB按摩

試諗下如果每晚有人幫你按摩，令你好relax，係咪諗起都想瞓一陣？其實只要幾分鐘就可以令到BB嘅肌肉慢慢放鬆。用BB平時用開嘅 Body Lotion 或 Baby Oil，慢慢由心口開始，之後按摩肚仔，雙手同雙腳，BB就會好舒服，仲可以增加安全感，令身體放鬆，產生睡意。Pbear 每次按摩完之後都會有好好嘅睡眠質素，同更加長嘅睡眠時間嫁！

Step 3 - 安靜時間

首先將房間嘅燈光較暗，然之後你可以選擇同BB講睡前故仔 Bed Time Story 或者唱搖籃曲。Ms Leely 會選擇喺呢個時候餵最後一餐奶，令Pbear 有睡意，但要注意！唔好俾BB呢個時候瞓着，因為好容易濁親佢！最後開背景音樂令BB情緒穩定，Pbear 最鍾意聽一閃一閃小星星，海洋聲都係唔錯嘅白噪音選擇。當BB睡眼惺忪嘅時候就可以將佢慢慢放落床，等佢習慣喺自己張床仔瞓覺。

最後Ms Leely 忠告各位媽媽如果想BB瞓得好，每晚同一時間要有一致嘅睡覺模式，做好以上三個步驟，你同你嘅BB都可以安枕無憂！

Text & Photo: Ms Leely

【誠徵Bloggers！】想分享你的懷孕及育兒日常？請將投稿連同約40字個人簡介和近照一張，電郵到： [email protected]，我們會幫你開設個人專欄，文章經編輯部潤飾後更有機會刊登在FB專頁，快點踴躍投稿吧！