女童誤吞磁珠 腸道壞死 5大高危物品 BB易誤食！

早前，內地一名2歲女童因為經常無故嘔吐，送往醫院檢查後發現佢原來誤吞14粒磁珠。由於磁珠互相吸住，將女童嘅腸組織一併夾住，出現腸道壞死情況，更引致腸穿孔。

大部分嬰幼兒都鍾意將隨手可得嘅物品放入口，唔單止容易病從口入，嬰幼兒更有可能會將物品誤吞，導致中毒，甚至致命。以下物品特別容易令嬰幼兒誤食及中毒，家長要注意！

1. 藥

大人服藥後應將藥物放回藥箱或櫃裡，並妥善鎖好，切勿亂放於枱上。藥丸顏色鮮艷，小朋友看到可能會以為係糖果。另外，亦要小心有冇將藥丸跌咗落地，稍不為意，小朋友喺地下見到都有機會執嚟食。若小朋友一次過進食多種或過多藥物、有藥物敏感等，都可能會令小朋友藥物中毒。

Photo from Mamidaily

2. 除臭珠、除濕劑

擺喺鞋櫃、衣櫃內嘅除臭珠、除濕劑都係危險物品之一，五顏六色，一粒粒球狀，似糖果又似啫喱。若大量進食可能會出現腹瀉、嘔吐甚至腸胃道潰瘍。

3. 化妝品

媽媽啲化妝品都要收好，小朋友唔止會拎嚟玩，四處塗抹，更可能會放入口當食物。化妝品含大量色素及其他化學成分，小朋友誤食後，有可能會中毒。

Photo from Mamidaily

4. 電池

過往有唔少小朋友誤食電池嘅新聞，如果小朋友嘅玩具、家中電器、遙控需要用電池、家長可以用膠紙黐實電池蓋，避免小朋友容易拆出電池。另外，換完電池後亦要將舊電池收好。小朋友萬一誤食電池可能會導致腸腐蝕。

Photo from Mamidaily

5. 殺蟲用品

好多人都會喺屋企角落位置擺放殺蟲用品，小朋友四圍爬，好易會當成食物誤食。或是唔小心摸到，然後又將手放入口內。若誤食後可能會中毒，出現腹瀉、嘔吐、痙攣等。家長應將殺蟲用品放置喺小朋友接觸唔到嘅地方，如果喺廚房位置，則應加上圍欄。

Text：Mami Editorial