【每個媽媽都會難忘的生仔記】

上回講到係屋企已經5分鐘痛一次，我以為自己一定好快生得，入到醫院，姑娘即刻幫我駁機聽bb心跳同量宮縮次數，做埋我一直心慌既內診（痛到癲），姑娘就講啦：「1度都未有！」我即刻心諗：「又話5分鐘痛一次已經好緊張？假架？」同事們係我生之前一直有同我分享生仔經驗，而大家一致認同既係：「生仔最緊要食得飽！」好！整左個雪茶肉絲米加腸蛋先！本來一直都話生之前要食魚柳包，不過我唔敢叫家姐買！陳醫生黎到，再檢查一次，建議我打止痛針瞓陣，再痛啲就打無痛分娩。我諗住我又唔係好痛，所以同姑娘講：「不如我痛啲先搵你呀！」（不過係錯既！陳醫生真係最應該相信既人物！）

最後瞓左一陣，開始痛醒，都係同姑娘講打止痛針，但打止痛針開始，就要一直留係產房，好彩老公可以陪我！又係衰，生仔太興奮，打完瞓唔著添！就繼續玩電話！

生仔前梗係食啲坐月唔食得既野啦！奶奶整左飯餸黎，最後老公挨義氣食曬，我就食左腸蛋出前一丁！

中午，陳醫生再黎睇我一次，我仍然未穿水，所以佢決定加快我既進度，人工穿水加催生針。人工穿水都驚驚地唔好講笑，陳醫生伸左隻手做內診，另一隻手就手拎一板長條倒三角型既野，我仲問：「我可唔可以去個廁所先？」陳醫生：「你唔係急架，只係感覺！我隻手係到咁架咋，唔會再痛多啲架啦！」

二話不說，佢就督左落去，的確人工穿水係無痛多左，只係感覺突然有股暖流係下面流出，我心諗：「果然係一個經驗豐富既醫生，連我驚都知！」一個鐘頭後，再加埋催生針！痛啦痛啦，開始好痛啦！要聞笑氣啦！初初聞既時候，覺得係止到痛架，仲high high地，好似飲醉酒咁既感覺，仲開始好似飲醉咁，開始亂講野！

起初感覺真係唔錯架！但突然開既度數大左，個痛真係痛到典床典蓆，點聞果個笑氣都係覺得好痛，開始痛到想跌落床，呢個時候既笑氣好似開始無咩用，聞得多仲有抖唔到氣既感覺！大鑊！頭先姑娘先話3度，幾時先10度呀？（又開始要講：陳醫生真係一個絕對需要相信既人物）我應該一早聽陳醫生話，早啲打無痛分娩，痛到呢刻先打，真係太遲，因為已經去到好痛啦！（後來姑娘話我應該開到6-7度所以咁痛。）

係呢個時間，我突然舉手：「姑娘！我要打無痛分娩！」姑娘：「而家打？打無痛要加1-2萬！」我：「我比！」姑娘即刻打比陳醫生報告情況，同問搵邊個麻醉師幫我打無痛分娩！打無痛分娩既時候，真心！我已經痛到我都唔記得麻醉醫生講過啲咩！我淨係記得佢係咁拍我，我心諗：「你講啦！」我好努力睜開眼：係！醫生：⋯⋯⋯⋯⋯（下刪我都唔記得既一百字）一路打無痛，一路聞個笑氣。麻醉醫生：「唔緊要，你痛就照聞啦！我等你！」我再次心諗：「頂！可唔可以快啲架！」一針吉入背脊，我大叫左出黎：「好痛！我隻左腳好痛！」醫生：「好！我地再黎！」醫生再插另一節，今次無事啦！醫生：「吸多幾次笑氣啲藥應該會發揮作用！」的確！吸左3次笑氣之後，終於唔痛！但我就已經無曬力，因為之前太痛，變到好想瞓覺！呢個時候姑娘一做內診：已經8度啦！好！我打比醫生！

好啦！進入直路！陳醫生黎到，睇左下我做左個內診，就講：「好啦！我而家去換衫，換完我地就開始啦！」跟住護士們就開始set場啦！護士會同我先練習下生既過程⋯⋯好記得佢會講：「吸一啖氣忍住用力！」雖然呢一刻我應該一分鐘痛三次，但打左無痛分娩，當然我唔痛但都會感受到下面有啲壓力，姑娘話一感覺到個壓力就要用力痾出黎！無錯！係痾出黎！佢地會講：「好大舊屎，用力痾出黎！」

陳醫生入黎啦⋯⋯正式開始！我一直以為自己會不斷講粗口！最後，一句野我都無講！無講我唔生啦！無講粗口！淨係諗：「我想快啲生完！」用左兩次力，陳醫生：「用力唔夠，要忍住啖氣用力10秒！」陳醫生一路數我一邊試！我都無咩進展，陳醫生：「點呀？你係咪好攰呀？好啦！等我幫幫你啦！」當然無感覺，我唔知佢幫左我啲咩！當然就剪左下面！我有見到佢拎個吸盤出黎！陳醫生：「加油呀穎茵！如果呢個時候開刀你就蝕架啦！你話過你會做到架麻！加油！」用力左幾次再加姑娘用力推我個肚，老公用力攬住我講：「加油呀！媽媽！」最後終於出到個頭，因為臍帶纏左頸，所以無等老公陳醫生就即刻剪左臍帶啦！再用力幾下，終於有用力痾左啲野出黎既感覺！陳醫生：「攪掂啦！」將bb放係我肚上面既布！真心！眼眶即刻熱熱地！姑娘即刻放左bb過一邊急救同清潔，bb喊啦！太好，喊者係無事！醫生就一邊連針，姑娘一邊幫我地影相！囡囡出世啦！

＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝

Text：Wing媽媽
Photos：Mamidaily

【誠徵Bloggers！】想分享你的懷孕及育兒日常？請將投稿連同約40字個人簡介和近照一張，電郵到： [email protected]，我們會幫你開設個人專欄，文章經編輯部潤飾後更有機會刊登在FB專頁，快點踴躍投稿吧！