救人英雄！狗狗及時發現被遺棄BB女 成功拯救小生命

狗狗唔止係人類嘅好朋友，擁有超強嗅覺嘅狗狗喺危急關頭時，經常都可以成功救人。近日喺俄羅斯就有一隻狗狗成功拯救被遺棄嘅BB女啦！

一個住喺俄羅斯聖彼得堡嘅狗主人近日帶住佢嘅愛犬Macho去公園散步時，發生咗一件非常驚險又有愛嘅事！Macho係一隻傑克羅素梗犬（Jack Russell Terrier），當日佢突然拉住主人行到一個非常偏僻嘅草叢，原來入面有一個啱啱出世嘅女嬰。

Photo from Mamidaily

主人事後表示，佢第一眼見到BB嘅時候，BB女被一件T-shirt包住，而且完全冇喊聲，只係啲手手腳腳好輕微咁喐緊，嚇到佢心跳得好快。然後佢即刻抱住呢個體溫極低、非常虛弱嘅BB到附近嘅國家近衞軍哨站求救。

經過多日嘅治療，依家BB女已經逐漸康復。俄羅斯近衞軍嘅發言人指，如果唔係醒目狗狗Macho及時發現，相信冇人會喺公園入面嗰個荒蕪嘅地方搵到BB！狗狗果然非常有靈性又機警！

Photo from Mamidaily

註：圖為示意圖，非涉事人物。

Text：Mami Editorial