全職媽媽唔等於唔使做 肯定忙過返工！

好多人羨慕全職媽媽唔使返工，全天候留喺屋企湊B！全職做媽媽其實真係辛苦過返工好多，不過唔係個個都明白，照顧小朋友並唔係抱住佢就叫湊B，而係有千千萬萬件小事加埋，真係攰到呻都唔想呻啊。以下呢8件事做媽媽嘅你一定了解！（抱抱）

Photo from Mamidaily

1. 唔夠瞓
仔女瞓覺永遠冇確實時間表，基本上日日都唔同時間起身。唯一可以肯定嘅就係每日都一定係喺早過自己起身，精神奕奕嘅BB擘大眼望住未瞓醒嘅媽媽。就係咁樣開始每一日～

2. 壓力大
負責全職照顧BB嘅媽媽，自己會想做得全面啲，想將最好嘅嘢畀晒佢哋。除咗自己嘅壓力外，每次BB有咩事，好似病、整親等嘅時候，就會入晒媽媽數。

Photo from Mamidaily

3. 萬能媽媽
做咗媽媽後，咩都要識！媽媽可以係護士、司機、廚師、攝影師、導遊等。小至餵奶、換片、?瞓覺等瑣碎事，大至營養、心理健康、揀學校等大件事，媽媽都要一手一腳做research，睇吓咩先最適合自己嘅BB。

4. 咩都要做
一日24小時，其實真係好唔夠用。除咗湊住BB，每日都要預備早午晚餐、做家務（洗衫、洗碗、晾衫、拖地等），仲要陪玩陪瞓，仲有唔同家庭大小事，反正係咩都要處理啦！

Photo from Mamidaily

5. 全年無休
返工都有大假、週末可以唞吓。照顧BB真係望少一眼都唔得，瞓多一陣都好似做唔晒啲嘢咁。攰都要頂硬上！

6. 零社交
湊B某程度上都幾困身，如果帶埋BB出去嘅話，又要帶齊所有換片餵奶食飯裝備，真係寧願留喺屋企。加埋小朋友去到陌生嘅地方，又好容易喊、扭眼瞓，好唔合作，同班朋友完全傾唔到偈。搵唔到人幫手睇住BB，真係好難出街。

Photo from Mamidaily

7. 忍受閒言閒語
冇工作，自然冇收入。有時聽到老公嘅家人，一有機會就畀說話自己聽，真係好唔開心。加埋有啲朋友或其他在職媽媽都唔明白自己，仲講埋啲好hurt嘅嘢：「嘩！你有人養，唔做返工，做少奶奶⋯」呢啲說話真係難聽過粗口啊。其實做全職媽媽都好忙㗎！

8. 犧牲事業
唔少媽媽都喺工作上拼搏多年，生咗小朋友後，為咗陪佢成長，不惜放棄一切嘅努力。雖然有時諗返都會覺得有啲可惜，又有少少不安，不過為咗BB咩都係值得。

Photo from Mamidaily

Text：Mami Editorial