夫妻保持親密關係8大攻略

兩個人嘅婚後生活，相處唔溝通真係超級大忌！如果感覺到大家嘅關係去到樽頸位，好似冇以前咁親密，就要留意以下8個夫妻感情保鮮小秘訣～ 如果做唔足呢8件小事，就要由今日開始坐言起行啦。

Photo from Mamidaily

1. 表達愛意
每日同老公/老婆講聲「好掛住你」或者「我愛你」，簡單一句說話已經好冧。（心心眼） 唔止係表達愛意，仲提醒自己有幾鍾意對方！關係就會愈嚟愈好啦～

2. 少指責
就算做咗啲你唔鍾意嘅事，都唔好亂責罵對方。好似返到屋企後，除鞋除襪後亂咁放，呢啲好明顯係壞習慣，默默地幫佢放返入洗衣籃已經可以避過一次罵戰！

Photo from Mamidaily

3. 少計較
婚後兩個人為咗家庭都有唔同程度嘅付出，可能係一個負責搵錢、一個負責照顧屋企大小事。唔好覺得自己做嘅事比對方嘅偉大，或者行啲咩「公平付出制」！切忌斤斤計較自己付出咗啲咩，對方冇做啲咩。

4. 出門前道別
每朝起身梳洗換衫後，不論另一半仲瞓緊覺定已經做緊其他嘢，出門口前一定要嚟個goodbye kiss！雙方唔止感到甜蜜，離開屋企出去工作都多一份力量～

Photo from Mamidaily

5. 欣賞及感激
謹記當初鍾意對方嘅原因，同時亦要繼續尋找另一半嘅優點！唔好以為伴侶做嘅所有事情都係理所當然，要每日懷著感恩嘅心相處。

6. 每週約會
返工嘅返工，湊仔嘅湊仔，時間其實真係唔夠用！不過每個星期點都要擠返啲時間二人世界，將仔女、朋友、煩惱放埋一邊，就算只係一齊食餐飯、拍拖行吓街，或者只係睇場戲，一定能夠令關係變得愈嚟愈好！

Photo from Mamidaily

7. 互相體諒
講就最容易，做就好難。凡事都企喺對邊角度諗，佢哋做得呢件事就有佢哋嘅理由。好似老公鍾意買figure，劃咗個櫃放出嚟欣賞，可能老婆覺得屋企冇位又嘥錢。不過諗深一層，各自有自己嘅喜好，老公阻止自己買手袋你又點諗呢～ 一人買一樣，打和啦！

8. 多溝通
最緊要咩都要講！千祈唔好驚煩乜都收收埋埋，對方絕對唔係你肚入面條蟲，唔會因為一個眼神知道你真實嘅諗法！

Photo from Mamidaily

Text：Mami Editorial