長相廝守嘅秘密！婚後12個老夫老妻行為

熱戀嘅感覺可能隨住結婚簽紙嗰刻消失得無影無蹤⋯⋯ 各位人妻唔使喊住！其實兩公婆踏入「老夫老妻」嘅境界，先至可以令一段關係變得成熟，唔係吓吓一嗌交就話要離婚，婚姻點keep住細水長流啊？以下12個日常舉動，唔知你哋又中咗幾多個呢？

Photo from Mamidaily

1. 相處模式：簡單
想做咩就做咩，唔使吓吓諗做咗之後有咩後果～ 例如：夜晚返到屋企好攰咩都唔想做，叫老公幫手掃吓地，完全唔過份～ 最多瞓覺之前幫佢按吓個膊頭！

Photo from Mamidaily

2. 約會地點：屋企
結婚之後，大家有個一齊住嘅地方，唔使再諗去你度定我度，而係留喺「我哋」嘅屋企！就算只係一齊喺張床上面攤吓，都已經好幸福。最開心係唔使再出街同人逼！

3. 說話方式：直接
未結婚前，講啲咩都要就住就住；婚後，你係我嘅人，我又係你嘅人，唔使再轉彎抹角。例如老公幾日唔洗頭，真係忍唔住嫌棄佢，再加一句：「你真係好臭啊！」

Photo from Mamidaily

4. 甜言蜜語：消失
老實講，冇甜言蜜語有咩所謂～ 最緊要有實際嘅行動！老公～今晚負責煮飯、洗碗、湊B就係最大嘅鼓舞！

5. 共同語言：暗號
絕對唔係一個眼神就明白對方咁簡單！多年嚟嘅默契，雙方已經創造咗一套獨一無二嘅溝通模式。一個「片」字可以有好多意思，唔一定係幫BB換尿片或者今晚瞓覺之前一齊睇影片，可能係指「幫我買薯片」～

Photo from Mamidaily

6. 講爛gag：無言
相信好多人嘅另一半都好「幽默」，無時無刻都可以食字搞gag。喺聽咗幾廿年嘅情況，你可以做嘅就只有無視。心諗，講咁多年都仲講緊呢句⋯⋯悶唔悶啲？

7. 展示內心：無所不談
就算已經求咗婚，有好多事都有口難言。喺生活上遇到好多令人無力嘅事，你咩都會同佢講！老公/老婆就係自己最信任嘅人，因為你清楚知道就算佢了解晒自己內心嘅黑暗面、悲慘過去等事情，都仲會無條件愛護你嘅人。

Photo from Mamidaily

8. 化妝打扮：偶爾
一個字：懶！唔好話素顏唔化妝，連自己個肚腩都睇過嘅人，仲有咩好驚？不過有時有啲特別嘅日子，都會畫吓眉、著靚少少嘅～

9. 遇到困難：商量
結咗婚之後，多咗個人同你分擔一切。好似返工返得唔開心，老公可能會話：「唔緊要，我養你！」真係幾MAN～ 又或者係老公肥咗幾磅，為咗身體健康，都會同佢傾吓點減肥。 有人依靠真係好有安全感～

Photo from Mamidaily

10. 紀念日：無視
婚前可能有好多紀念日，求婚日、訂婚日等，婚後基本上全部都冇再記過。不過每年最緊要係慶祝結婚紀念日，雖然九成九男人都唔記得確實日子！（反白眼）

11. 壞習慣：接受
好似扯鼻鼾、磨牙呢啲極度影響睡眠質素嘅行為，已經完全無視。反正都冇辦法改變，唯有扮聽唔到啦！

Photo from Mamidaily

12. 身份改變：家人
結咗婚後，另一半唔止係朋友、伴侶，而係昇華至家人。做家人唔代表冇咗愛情，只係再多咗一份責任。最重要係你哋將會或已經生咗小朋友，組織一個屬於自己嘅家庭！

Text：Mami Editorial