4歲女童尿片驚現曱甴蛋 被揭住垃圾屋 蟑螂老鼠同眠

日前，台灣苗栗市一名發育遲緩4歲女童，喺幼稚園返學期間，老師幫佢換尿片時，發現尿片非常污糟，更有蟑螂蟲卵。於是由社工接手跟進，上門查訪後發現女童嘅居住環境極度惡劣。

由於女童父母人間蒸發，細細個已經同外曾祖母、外公、外婆及姑婆同住。全家人以拾荒維生，居住地方長期堆滿大量垃圾雜物，蟑螂老鼠橫行，連企嘅位置都冇，環境同衛生都惡劣不堪，女童被迫喺垃圾堆中瞓覺。

社工過往曾多次上門拜訪女童一家，惟一直被拒。後來成功被20幾名救援協會義工勸服，終於願意接受援助，義工為女童一家清理垃圾。但由於女童一家有工作能力，並唔符合低收入戶嘅標準，所以無法獲得更多援助。社工又指，女童媽媽為未婚媽媽，誕下女童不久就離家出走，而父親又對女童愛理不理，全家只靠外公打散工、擔任看護，拎住每月1萬元新台幣及女童每月獲發嘅3000元津貼維生。

Text：Mami Editorial