消委會：75款食品樣本 部分反式脂肪含量高

家長為小朋友準備早餐要注意啦！消委會測試咗市面上75款非預先包裝食品，如：牛油蛋糕、蛋撻、雞批、酥皮湯等，發現有食物進食一份，就已經接近超標！

Photo from Mamidaily

上年11月至12月，消委會同食安中心喺餐廳、連鎖快餐店、外賣店、烘培店等，搜集咗75款食品樣本，分別為酥皮撻類、曲奇蛋糕、中式酥餅及其他類別食物。眾多食品中，「聖羅蘭餅屋」牛油蛋糕嘅反式脂肪含量最高，食一件已經攝入每日上限嘅84%。

Photo from Mamidaily

而喺26款酥皮撻類食品當中，雞批嘅反式脂肪含量最高，每100克含0.65克反式脂肪。位於長沙灣「新華茶餐廳」嘅雞批，重115克，食一件已經攝入每日上限嘅49%。而反式脂肪相對較低嘅為「美心」甜雞批，每件攝入每日上限嘅10%。

Photo from Mamidaily

另外，喺19款中式酥餅及其它類別食物中，九龍灣「Panash」糖環冬甩嘅反式脂肪含量為最高，每件攝入每日上限嘅20%，其次為觀塘「Mos Burger」嘅薯條，每份攝入每日上限嘅18%。而喺中式酥餅中，反式脂肪相對較低嘅係，「榮華」老婆餅，每份攝入每日上限嘅3.9%。

消委會提醒，攝取過多嘅反式脂肪，會導致壞膽固醇增加，長遠更有可能患冠心病，市民應減少食用油炸或高脂嘅烘焙食品，盡量選擇反式脂肪含量較低嘅食品，喺煮食時亦可考慮使用較健康嘅食油代替人造牛油及起酥油，以多用蒸煮取代煎炸。

Text：Mami Editorial
Source：消委會