download MamiDaily 親子日常 app
《教束》揭香港教育3大問題 補習風氣盛行 11歲小學生飽受壓力

《教束》揭香港教育3大問題 補習風氣盛行 11歲小學生飽受壓力

教育路
By Jacqueline on 14 Jun 2019
Senior Editor

電視節目《教束》以教育為主題,主要講述現時香港教育制度正面對嘅問題,題材貼地又新鮮,開播後獲得唔少好評。

合約老師被針對 返工要「跑數」

劇中主角劉俊謙(盧sir)飾演一名合約教師,喺一間名校任教中文長達5年,不過一直被委派教成績最差嘅班別。而喺校長角度,學生成績差,就等於老師能力不足,教得唔好,因此盧sir長期被校長針對。加上學校規定合約完結後,會解僱教學成績最差嘅老師,所以盧sir更一直徘徊喺被炒邊緣。

ViuTV電視截圖Photo from ViuTV電視截圖

ViuTV電視截圖Photo from ViuTV電視截圖

為保飯碗 不擇手段

盧sir為咗保住飯碗,喺考試前預先將試題派畀成績差嘅學生,等佢哋可以提早做好準備,喺考試時獲得好成績,結果被副校長發現。於是副校長要脅盧sir,要佢聯同其他學生組成素人學生會,與精英班對決,推翻精英學生喺學校壟斷嘅情況。副校長更表示成功勝出就會將盧sir轉為長約老師。面對利誘,盧sir用盡方法達到副校長要求。

ViuTV電視截圖Photo from ViuTV電視截圖

ViuTV電視截圖Photo from ViuTV電視截圖

補習風氣盛行

劇中除咗講學校制度同老師問題外,新一集更提到學生補習風氣。陳太帶11歲大嘅囝囝去補習社面試,被要求用英文作自我介紹,囝囝講咗三句已被Miss打斷,隨即被抽問英文生字讀法,囝囝唔識讀,Miss非常凌厲地唬嚇陳太:「其實以依家小學生嘅英文水平嚟講,剛才嘅生字係基本嘢,憑你個仔啱啱嘅自我介紹,佢英文係掹掹緊,疊埋心水入Band 3啦!」眼見陳太面有難色,Miss隨即打蛇隨棍上,叫陳太報讀多個英文精讀班,幫囝囝打好個底。

ViuTV電視截圖Photo from ViuTV電視截圖

ViuTV電視截圖Photo from ViuTV電視截圖

老師為生計不擇手段、家長想仔女嬴左起跑線、補習風氣盛行、學生壓力大,《教束》每一幕都係社會嘅縮影,值得各位家長反思。

【隨時隨地接收更多育兒教育資訊】

📱 立即下載 MamiDaily 親子日常APP

🤱🏻 追蹤我們的 Instagram: mamidaily.hk

🔔 訂閱 MamiDaily 親子日常 Youtube頻道